कोनोफे बालबालिका सडकमे बेवारिसे अवस्थामे भेटे नैपरलः मन्त्री चौधरी

पहुरा समाचारदाता
धनगढी, १४ जेठ । महिला, बालबालिका तथा ज्येष्ठ नागरिक मन्त्री भगवती चौधरी कैलाली ओ कञ्चनपुरके बाल संगठनके अनुगमन करले बटी ।

जिल्ला भ्रमणके क्रममे मन्त्री चौधरी बाल संगठनके अनुगमन करके यहाँक अवस्थाके बारेमे जानकारी डेहल हुइट । उ क्रममे नेपाल बाल संगठन सुदूरपश्चिम प्रदेश समितिसे धनगढीमे बाल संरक्षण गृह (बालग्राम) स्थापना कैना बटाइल रहे । मन्त्री चौधरीहे नेपाल बाल संगठन सुदूरपश्चिम प्रदेश समितिके सभापति चुनामणि भट्ट ज्ञापन पत्र बुझैटी तत्काल धनगढीमे बालग्राम स्थापनके आवश्यकता महसुस हुइल ओ ओकर लाग बजेट अभाव डेखल बटैले रहिट ।

नेपाल बाल संगठनके ज्ञापन पत्र बुझ्टी मन्त्री चौधरी समस्या समाधानके लाग अपन पक्षसे हुइना सक्कु कामके लाग अपने तत्पर रहल बटैली । उहाँ बालग्राममे बैठल बालबालिकाहुकनहे विशेष ध्यान डेनाफे आग्रह करटी बालबालिकाके सुरक्षामे विशेष ध्यान डेहे पर्ना निर्देशन डेलै ।

मन्त्री चौधरी कहली, मै काल्हसे यी विषय नियल्टी रहल बटु । अपनेहुक्रे पूर्ण बाल अधिकार सुनिश्चित कैना करके लग्बी सरकारके साथ अपनेहुकनहे रही ।’

बालकहुकनके शिक्षा ओ स्वास्थ्यमे विशेष ध्यान डेनाफे मन्त्री चौधरी निर्देशन डेली । उहाँ अब्बेफे सडक बालबालिकाके विषयमे गम्भीर हुई पर्ना अवस्था रहल बटैली । नेपाल बाल संगठनके सुदूरपश्चिममे ढेर संरचना रहल मने उ संरचनाके संरक्षण हुई नइसेकल विषयमेफे अपनेहुक्रे गम्भीर रहल उहाँके कहाई रहे ।

‘प्रधानमन्त्री ओ पूर्व प्रधानमन्त्रीफे यी विषयमे चासो रख्न हुइल बा । उ सक्कु संरचना ओ सम्पत्ती सरकारसे संरक्षण करठ, उहाँ कहली । ४० से ढेर जिल्लामे संरचना ओ सम्पत्ती रहल कहटी सक्कु संरक्षण करे पर्ना अवस्था रहल उहाँ बटैली ।
स्थापना कालसे अनाथ तथा असहाय बालबालिकाहे हेरचाह करटी आइल धनगढी बाल संरक्षण गृहमे अब्बे २० जाने बालक रहल बटै । ओइने लग्गेक त्रिनगर विद्यालयमे अध्ययन करटी रहल बटै ।

उ अवसरमे अभिनफे अभिभावक विहीन ढेर बालक सडकमे भौँतरटी रहल ओ छोटमे अभिभावक गुमाइलहे शिक्षा स्वास्थ्य पैनाफे सकस हुइल कहटी अभिन ढेर क्षमताके बालगृह स्थापनाके लक्ष्य लेहल भट्ट मन्त्री चौधरीहे जानकारी करैले रहिट । ज्ञापन पत्रमेफे प्रदेश स्तरीय बालगृह स्थापनाके लाग १० करोड रुपैयाँ माग करल बा ।

‘१ बिगाह ४ कटठा दर्ता जमिन ओ ८ कटठा ऐलानी जग्गा सदुपयोग हुइटी रहल बा । प्रदेश स्तरीय बालग्रामके रूपमे आघे बह्राई खोज्टी रहल बटी मन्त्री चौधरीहे बुझाइल ज्ञापन पत्रमे कहल बा, प्रदेश स्तरीय बालग्राम निर्माणके लाग १० करोड विनियोजन कैना आग्रह करटी, ज्ञापन पत्रमे कहल बा । धनगढी उपमहानगरसे सटर भत्काइल ओरसे आम्दानीके स्रोत समेत बन्द हुइल गुनासो ज्ञापन पत्रमे उल्लेख करल बा । नियमित आय स्रोतके लाग तत्काल व्यवसायीक भवन निर्माण कैना ओ ओकर लाग २ करोड माग करल बा ।

ओस्टेक करके नेपाल बाल संगठन कञ्चनपुरके अनुगमन करटी मन्त्री चौधरी बाल संगठनके सम्पत्तिके संरक्षण कैना निर्देशन डेटी टमान व्यक्तिसे अतिक्रमण करल २ विगाहा जग्गा फिर्ता लेके राज्यके सम्पत्तिके संरक्षण करलप्रति धन्यवाद व्यक्त करली ।

सक्कु जाने सरकारी सम्पत्तिके संरक्षण कैना आवश्यक रहल कहटी उहाँ सडकमे कौनोफे बालबालिका बेवारिसे अवस्थामे विल्गाई नइहुइना बटैली । ‘पूर्व प्रधानमन्त्री केपी शर्मा ओलीसे सडक मानव मुक्त अभियान चलैले रहिट । बालबालिकाके संरक्षण कैना हमार सक्कु जानेक दायित्व हो । बालबालिकाके संरक्षण कैना ओर अपनेनके फे लागी, मन्त्री चौधरी कहली ।
बालबालिकाके सर्वोपरि हितहे ध्यानमे धारके सक्कु जाने काम करे पर्ना उहाँके कहाई रहे । उ अवसरमे नेपाल बाल संगठन कञ्चनपुरके सभापति रामबहादुर बुढा बाल संगठनके विकास तथा बालबालिकाके संरक्षणके निम्ति ढेर काम कैना आवश्यक रहल बटैली ज्ञापन पत्र बुझाइल रहिट ।