कैलारीमे चालु आर्थिक बर्षके ७० प्रतिशत योजना सम्पन्न

पहुरा समाचारदाता
हसुलिया, १४ जेठ । कैलारी गाउँपालिका चालु आर्थिक बर्ष २०८०÷०८१ मे सञ्चालित ७० प्रतिशत योजना सम्पन्न हुइल बा ।

चालु आवमे करिब १ सय ५० ठो योजना सम्झौता हुइलमे मन्से करिब एक सय योजना निम्जल गाउँपालिका स्तरीय अनुगमन समिति जनैले बा । गाउँपालिका स्तरीय अनुगमन समितिके संयोजक तथा गाउँपालिका उपाध्यक्ष भगवतीकुमारी चौधरीके नेतृत्वमे सोम्मारके रोजसे टमान वडामे सञ्चालित सम्पन्न योजना ओ सम्पन्न हुइना चरणमे रहल योजनाके अनुगमन कैगिल रहे ।
आर्थिक बर्ष ओरैना करिब डेढ महिना केल बाँकी रहल ओरसे सञ्चालित योजना समयमे सम्पन्न कैना संयोजक भगवती कुमारी चौधरी निर्देशन डेले बटी ।

उहाँ कहली, ‘टमान वडामे सञ्चालित सम्पन्न हुइना बाँकी योजना मापदण्ड अनुसार समयमे पुरा करी । मापदण्ड अनुसार काम हुइल योजनाके भुक्तानीमे सहजता हुई सेकी । काम कैना शिलशिलामे कहु कम्जोरी हुई सेकठ मने उहीहे सुधार करके मापदण्ड अनुसारके काम समयमे सम्पन्न करी ।’

कैलारी गाउँपालिकाके योजना शाखा प्रमुख सन्तोषकुमार चौधरी चालु आर्थिक बर्षमे करिब १ सय ५० योजना सम्झौता हुइलमे अब्बेसम एक सय योजना सम्पन्न हुइल बटैलै । उहाँ कहलै, ‘अब्बे योजना धामधम सम्पन्न हुइटी रहल बा । सम्पन्न हुइना बाँकी योजना हाली सम्पन्न कैना कहल बा ।’

ओस्टेक उहाँ चालु आर्थिक बर्षमे सञ्चालन हुइल सम्पन्न योजनाके अनुगमन करल बटैलै । पालिका स्तरीय अनुगमन समितिसे सोम्मार रोज तराई मधेश कार्यक्रम अन्र्तगत सम्पन्न हुइल कैलारी–५ ओ ७ नम्बर वडाके सडक स्तरोन्नतीके अनुगमन कैगिल बा । कैलारी–७ मे लुज ग्राभेल, वडा–७ ओ २ मे सडक स्तरोन्नती योजनाके अनुगमन कैगिल बा ।

कैलारी–७ राष्ट्रिय आधारभूत विद्यालयके भान्साघर, वडा नम्बर ५ मनकामना प्रावि मनिकापुरके भान्साघर, वडा नम्बर ९ के जनता आवि सामारचौरा, जनता मावि गदारिया, शिवशक्ति आवि वनकट्टा, वडा नम्बर ६ के वनकट्टाके जानकी मावि, सरस्वती मावि खरुवाखेरा, कालिमाई आविके भान्साघरके अनुगमन कैगिल बा ।

ओस्टेक कालिमाई आविके घेरवार, बनकट्टाके जानकी माविके खेलमैदान, गदरियाके जनता माविके सरस्वती मन्दिर, सामारचौरामे विल्डअन ओ गाउँपालिकासे सहयोग हुइल निर्माण सम्पन्न हुइल विद्यालय भवन, कैलारी–४ के गाउँमे रहल गरिमा प्राविके विद्यालय भवनके अनुगमन कैगिल बा ।

ओस्टेक अनुगमन समितिसे कैलारी गाउँपालिकाके वडा नम्बर ५,७ ओ ६ नम्बर वडामे रोजगार सेवा केन्द्रसे संचालित प्रधानमन्त्री रोजगार कार्यक्रम अन्र्तगतके योजनाके स्थलगत अनुगमन कैगिल बा ।

अनुगमनमे समितिके संयोजक भगवतीकुमारी चौधरी, योजना शाखा प्रमुख सन्तोषकुमार चौधरी, कार्यपालिका सदस्य लालबहादुर विक, असई हिमाल कुश्मी कैलारी गाँउपालिकाके रोजगार सहायक ईन्द्रश्याम चौधरी ओ रामकृष्ण चौधरीलगायतके सहभागिता रहे ।