अलग–अलग ठाउँमे मृत अवस्थामे तीन जाने फेला

पहुरा समाचारदाता
धनगढी, १६ जेठ । कैलाली ओ कञ्चनपुरके अलग अलग ठाउँमे मृत अवस्थामे तीन जाने फेला परल बटै ।

मंगरके रोज ७ः३० बजेके समयमे जिल्ला कैलाली, टिकापुर न.पा.९ मोहना लडियक किनारमे जमल पानीमे भजनी न.पा.१ गोदाम टोल बैठना बर्ष १९ के एकेन्द्र बोहरा मृत अवस्थामे फेला परल हुइट । उ सम्बन्धमे इलाका प्रहरी कार्यालय टिकापुर, कैलालीसे आवश्यक अनुसन्धान हुइटी रहल बा ।

ओस्टे मंगरके रोज साढे दुई बजे कैलालीके धनगढी उ.म.न.पा. ६ जाली पुल लग्गे जिल्ला डोटी, बोगटान न.पा.७स्थायी घर रहल हाल धनगढी–६ जाली बैठना बर्ष ४० के घनश्याम बम अचेत अवस्थामे फेला पारके आफन्तसे उपचारके लाग निसर्ग अस्पताल धनगढीमे नानलमे डाक्टरसे चेक जाँच करेबेर मृत घोषणा करल रहिट उ सम्बन्धमे जिल्ला प्रहरी कार्यालय कैलालीसे आवश्यक अनुसन्धान हुइटी रहल बा ।

ओस्टेक मंगरके रोज पौने एक बजे कञ्चनपुर, पुनर्वास न.पा.७ परासन स्थित नारायण रानाके उखुबारीमे ३ बर्षसे चौकीदारके काम करटी आइल जिल्ला कैलाली, गौरीगंगा न.पा.१ घर रहल हाल पुनर्वास न.पा.९ (ख) गाउँ बैठना बर्ष ६२ के सब्रा चौधरी मृत अवस्थामे फेला परल बटै । उ सम्बन्धमे इलाका प्रहरी कार्यालय त्रिभुवनवस्ती, कञ्चनपुरसे अनुसन्धान हुइटी रहल बा ।