जोशीपुरमे गोंरी बिन्ना तालिम

पहुरा समाचारदाता
जोशीपुर, १७ जेठ । कैलालीके जोशीपुरमे गोंरी बिन्ना तालिम डेहल बा । जेठ ७ गतेसे सुरु हुइल विपन्न दलित ओ मुक्तकम्लरी महिलाहुकनहे सीप विकास अन्तरगत ढकिया बनैना तालिम डेहल हो ।

१० दिनके तालिममे हस्तकला सीपसे ढकिया, फेरुवा, पन टोप्ना, सुप्पा, फुलदानी, नोन्ही, जग, टोपी, खुत्रुके, डिलिया, रोटी धरना हटकेस, श्रृङारदानी लगायतके सामग्री बनैना सहभागीहुक्रे सिखले बटै ।

हस्तकला सीपहे प्रवद्र्धन करके पर्यटनसंग जोरे सेक्लेसे मनग्य आमदानी लेहे सेक्नाके साथे महिलाहुक्रे स्वरोजगार बन्ना जोशीपुर गाउँपालिका अध्यक्ष चित्रबहादुर चौधरी बटैलै । विशेष करके पहिचानके मुद्दा लेके अपने स्थानीय सरकार प्रमुख बनल जानकारी डेटी तालिम अपन पहिचान खुल्न चिज वस्तु, कला सीप देख्के हर्षित हुइलफे उहाँ बटैलै ।

गोंरीसे बनल टमान सामग्रीके माग वह्रटी गैलसंगे तालिम प्राप्त महिला दिदिबहिनीयाहुक्रे बनाइल सामग्रीहुक्रे मुल्य पैना कार्यक्रमके सभाध्यक्ष जोशीपुर गाउँपालिका उपाध्यक्ष रेखादवी कठरिया बटैली ।

विशेष करके धान लगाके सेकलपाछे गोंरी विन्न चलन थारु समुदायमे रहलसेफे अब्बे यी लोपुन्मुख अवस्थामे रहल बा । वाहेर राष्ट्रिय तथा अन्तराष्ट्रियस्तरमे माग बह्रल मने गोंरी विन्न चलन हेरैटी गैल बा । थारु समुदायके पहिचान खुल्न यी तालिमके लाग आवश्यक मुंज, पुँजा, छेड्ना, कैंचि लगायतके सामग्रीफे लोप हुइटी गैल बा ।

तालिमके लाग कच्चा पदार्थ जोशीपुर गाउँपालिका क्षेत्र भिटर नइपैना दुखद विषय रहल उहाँ बटैलै । पहिले अपन घरमे प्रयोग करेक लाग केल गोंरीसे टमान सामग्री बनाजाए ।

अपन छाईनके भोजमे पहुँराके रुपमे ढकिया, भौंका, फेरुवा, पनटोपा लगायतके सामग्री डेना चलन रहे । उ आवके समयमे कुछ कहु केल डेखे मिलठ । अटरा मजा सीपसे उत्पादन हुइल सामग्रीहे व्यवसायिक रुपमे विदेशमे विक्री करे सेक्लेसे अर्थात व्यवसायसंग जोरे सेक्लेसे सीपके प्रवद्र्धनमे टेवा पुग्न वहाँ बटैली ।

ओस्टे करके वडा नं. ७ के वडा अध्यक्ष बम बहादुर शाह हातसे बुनल सामग्रीहे विदेशी ढेर मन परैना हुइल ओरसे यकर माग ढेर बह्रटी रहल बटैलै । गोंरी बिन्न तालिमके लाग १० दिन छोट समय हुइल ओरसे १ महिना सम तालिम ह्ुइलेसे बुट्टादार गोंरी बनाई सिख्ना ओ थप सामग्री बनाई सेक्ना सहभागीहुक्रनके कहाई बा । महिलाहुक्रे यी तालिम पाके खुशी लागल बटैलै ।