मानव अधिकार संरक्षणके लाग घटनाके वास्तविक अवस्थाके पहिचान आवश्यक

पहुरा समाचारदाता
धनगढी, १७ जेठ । राष्ट्रिय मानव अधिकार आयोग सुदूरपश्चिम प्रदेश कार्यालयके प्रमुख हरिप्रसाद ज्ञवाली मानव अधिकारके सम्मान तथा संरक्षणके लाग मानव अधिकार रक्षकहुक्रे घटनाके वास्तविक अवस्थाके पहिचान ओ सार्वजनिकीकरण करे परना बटैले बटैं ।

अनौपचारिक क्षेत्र सेवा केन्द्र (इन्सेक) सुदूरपश्चिम प्रदेशके आयोजनामे बुधके रोज धनगढीमे हुइल मानव अधिकार रक्षकहुकनके लाग क्षमता अभिबृद्धि कार्यक्रममे उहाँ मानव अधिकारके उल्लंघन रोक्ना ओ हुइ नैडेहेक लाग आवधिक, विश्वासनिय ओ तथ्यपरक सूचना संकलन करे परना बटैलैं ।

उहाँ कलैं, “मानव अधिकार रक्षकहुक्रे घटनाके वास्तविक अवस्थाके पहिचान ओ सार्वजनिकीकरण करलेसे राज्यके दायित्वहे पुनर्बल प्रदान करे सेकठ ।”

उहाँ मानव अधिकार सुधारके लाग लेहे परना आवश्यक कदमके विश्लेषण कैके दोषीहे कारवाही ओ पीडितहे न्याय दिलैना वातावरण तयार करना मानव अधिकार रक्षकके दायित्व रहल फेन रहल बटैलैं ।

इन्सेक सुदूरपश्चिम प्रदेश संयोजक खड्कराज जोशी मानव अधिकार घटना उल्लंघनके अवस्था, अनुगमन, सूचना संकलन, तथ्य सार्वजनिक, न्यायके लाग सहकार्य, पीडितके संरक्षण ओ पीडकहे कानुनी प्रक्रियामे नानेक लाग मानव अधिकार रक्षकहुकनके अहम भूमिका रहल बटैलैं ।

उहाँ नागरिक तथा राजनीतिक अधिकार, आर्थिक, सामाजिक तथा सांस्कृतिक अधिकारके संरक्षण, सम्बद्र्धन ओ प्राप्तिके लाग शान्तिपूर्ण प्रयत्न करना व्यक्ति ओ समूहके आवश्यकता रहल ओरसे आवाज बिहिनके आवाज बनके मानव अधिकार रक्षक सक्रियापूर्वक काम करेपरना बटैलैं ।

उहाँ मानव अधिकार रक्षकहुक्रे मानव अधिकार उलंघनके घटनामे पीडितके तत्काल जरुरी संरक्षण, न्यायके पहल, मनोसामाजिक अवस्था अनुकूलन ओ सामाजिकीकरणमे सहयोग करे सेक्ना बटैलैं ।

कार्यक्रममे इन्सेकके प्रलेख अधिकृत कृष्ण विश्वकर्मा मानव अधिकार रक्षकहुक्रे अपन काम अब्बल बनाइक लाग मानव अधिकार हनन्के घटनाके अनुसन्धानके क्रममे प्रयोग करे सेक्ना सूचना, जानकारी, प्रामाणिक कागजात वा लिखित विवरण वा श्रव्य वा दृश्य वा तस्विरहे सकलन कैके व्यवस्थित रुपमे ढरे परना बटैलैं । सूचनाके सक्रिय संकलन, पुष्ट्याई कैके तत्काल प्रयोग करे सेक्लेसे मानव अधिकारके समस्या समाधान करे सेक्ना उहाँ बटैलैं ।

कार्यक्रममे डिडब्ल्युआरएफके कार्यक्रम संयोजक सिर्जना पराजुली, इन्सेक जिल्ला प्रतिनिधि मैनामोती चौधरी, पत्रकार सुनिता विकलगायत मन्तव्य व्यक्त करले रहैं ।

कार्यक्रमके सञ्चालन वीरेन्द्र शाह करले रहैं । कार्यक्रममे सुदूरपश्चिम प्रदेशके टमान जिल्लाके संघसंगठनमे आवद्ध रहल मानव अधिकार रक्षकहुकनके सहभागिता रहल रहे ।