तीन महिने आधारभूत सिलाई कटाई तालिमके अनुगमन

पहुरा समाचारदाता
हसुलिया, ३० जेठ । कैलारी गाउँपालिकाके वडा नम्बर ४ के ‘गाउँ’मे हुइटी रहल तीन महिना आधारभूत सिलाई कटाई तालिमके अनुगमन कैगिल बा ।

गाउँपालिका उपाध्यक्ष भगवतीकुमारी चौधरी उ सिलाई कटाई तालिमके अनुगमन करल रहिट । अनुगमनके क्रममे उहाँ प्रशिक्षर्थीहुकनके जाँगर लगाके सिख्ना आग्रह करल रही । उहाँ कहली, ‘सिलाई कटाई सिखके अपने व्यवसाय संचालन करे सेक्लेसे अपने गाउँठाउमे बैठके काम करेसेक्ना, रोजगारीके लाग कहु जाई नैपर्ना ओ एक दुई रुप्याके लाग कहु हात जोरे नइपरी, मजा कमाही करे सेक्जाइठ ।’

अपन घल्ना कपरा ओ घरपरिवारके घल्ना कपरा सिए सेक्लेसेफे ढेर बचत करे सेक्ना उहाँ बटैली ।

कैलारी गाउँपालिका वडा नम्बर ४ आयोजना ओ सहास नेपालके सहकार्यमे ‘सीप सिखौ आत्मनिर्भर बनौ’ कना नाराके साथ लक्षित वर्ग कार्यक्रम अन्र्तगत दलित महिलाहुकनके उत्थानके लाग तीन महिना आधारभूत सिलाई कटाई तालिम चैत ६ गतेसे असार ५ गतेसम संचालन हुइना वडा नम्बर ४ के वडा अध्यक्ष ठागुराम चौधरी बटैलै । अनुगमन कार्यक्रममे वडा सदस्य सुवा परियार, हरिद्वारी चौधरी, लक्ष्मी चौधरीलगायतके सहभागिता रहे ।