८५ जहन रोजगारीके लाग सिफारिस

२ हजार ६६९ जाने रोजगारीके लाग निवेदन दर्ता

पहुरा समाचारदाता
धनगढी, ३० जेठ । सुदूरपश्चिम प्रदेश स्तरीय श्रमाधान रोजगार मेलामे ८५ जहन रोजगारीके लाग सिफारिस कैगिल बा ।

सुदूरपश्चिम प्रदेशके धनगढीमे अँट्वार ओ सोम्मार दुई दिन सञ्चालन हुइल मेलामे रोजगारदाताके ओरसे २ हजार ४०६ पदके लाग माग प्राप्त हुइलमे अनलाईन प्रणाली ओ भौतिक उपस्थिति मार्फत कूल २ हजार ६६९ जाने रोजगारीके लाग निवेदन दर्ता करले रहिट । आवेदक मध्ये ८५ जहनहे रोजगारीके लाग सिफारिस कैगिल नेपाल तालिम तथा रोजगार व्यवसायी महासंघ, सुदूरपश्चिम प्रदेशके अध्यक्ष प्रमोद पाठक बटैलै ।

श्रमाधान रोजगार मेलामे ३८ ठो टमान स्टल रहे जेम्नेसे १० ठो स्टल सरकारी क्षेत्रसे ओ २८ ठो स्टल रोजगारदाताके ओरसे रहल रहे । श्रमाधान रोजगार मेलामे करिब दश हजार एक सय पचास जाने अवलोकन करल रहिट । मेलामे श्रमाधान सम्बाद, सांस्कृतिक प्रस्तुति लगायतके कार्यक्रम समेत आयोजना करल रहे ।

श्रमाधान संम्बादमे रोजगारी सिर्जनामे सरकार ओ निजी क्षेत्रके भूमिकाः अवस्था, चुनौती, सम्भावना, वर्तमान श्रम बजारमे सीप प्रमाणीकरण, पूर्व सिकाई मान्यताके भूमिका, अबके यात्राः योगदानमे आधारित सामाजिक सुरक्षा, सुदूरपश्चिमके लाग नेपाली श्रम बजार काहे अटरा सुदूर तथा श्रम आप्रवासनः कानूनी प्रकृया ओ मनोसामाजिक प्रभाव लगायतके विषयमे डा हेमराज पन्त, शिवहरी मुडभरी, रामबहादुर रावत, अनिलकुमार भोजानीया, सामाजिक विकास मन्त्रालयके सहसचिव गणेशबहादुर सिंह, कैलारी गाउँपालिकाके उपाध्यक्ष भगवतीकुमारी चौधरी, कैलाली उद्योग बाणिज्य संघके वरिष्ठ उपाध्यक्ष पुष्कर ओझालगायतके प्राज्ञिक तथा रोजगारदाताहुक्रे विचार विमर्श करल रहिट ।

श्रम रोजगार तथा सामाजिक सुरक्षा मन्त्रालय, सुदूरपश्चिम प्रदेश सरकार, धनगढी उपमहानगरपालिका, टीकापुर नगरपालिका, भीमदत्त नगरपालिकाके आयोजना ओ नेपाल तालिम तथा रोजगार व्यवसायी महासंघ सुदूरपश्चिमके संयोजनमे, निजी क्षेत्रके संघसस्था, विकास साँझेदार ओ अन्य सरोकारवालाके सहकार्यमे श्रमाधान रोजगार मेला संचालन हुइल रहे ।

मेलाके उदघाटन माननीय उद्योग वाणिज्य तथा आपूर्ति मन्त्री दामोदर भण्डारीके बरका पहुनामे ओ सुदूरपश्चिम प्रदेश सरकारके माननीय भूमि व्यवस्था, कृषि तथा सहकारी मन्त्री टीका थापाके विशेष आथित्यमे हुइल रहे कलेसे समापन कार्यक्रम धनगढी उप महानगरपालिकाके नगर उपप्रमुख कन्दकला कुमारी रानाके बरका पहुनामे हुइल रहे ।

कार्यक्रम नेपाल तालिम तथा रोजगार व्यवसायी महासंघ, सुदूरपश्चिम प्रदेशके अध्यक्ष प्रमोद पाठकके अध्यक्षतामे हुइल रहे । समापन कार्यक्रममे मेला अवधीमे रोजदारदाता, ८८ ठो स्थानीय तहके रोजगार संयोजक, सहजकर्ता सहआयोजक संघ संस्थाहे सम्मानपत्र तथा धन्यवाद ज्ञापन करल रहे ।

मेलामे सुरक्षा निकाय, आईएलओ, स्वीस हेल्भेटास, विश्वविद्यालय, नेपाल बैकर्स एशोसियसन, नेपाल नगरपालिका संघ, गाउँपालिका संघ, गाउँपालिका राष्ट्रिय महासंघ नेपाल, नेपाल संयुक्त युनियन समन्वय केन्द्र, प्रत्येक प्रदेशमे रहल स्थानीय तह, नेपाल एशोसियसन अफ टुर एण्ड ट्राभल एजेन्ट्स, टेकिगं एजेन्सी एशोसियसन अफ नेपाल, नेपाल माउन्टेरिगं एशोसियसन, सेभ द चिल्ड्रन, वल्डलिंक कम्यूनिकेशन ओ नेपाल टेलिकमके फे सहभागीता रहे ।