लक्षितवर्ग कार्यक्रममे सीमान्तकृत समुदायहे समटेनामे जोड

पहुरा समाचारदाता
धनगढी, ३१ जेठ । मानव अधिकारको लागि महिला एकल महिला समुह तथा कुर्वेवोष्ट्रोके संयुक्त साझेदारीमे कैलारी गाउँपालिकाके ९ वडामे संचालित परियोजना ‘सामाजिक सदभावका लागि नागरिक सहभागिता’ कार्यक्रम अन्र्तगत स्थानीय परियोजना सल्लाहकार समितिके बैठक विफेक रोज हसुलियामे निम्जल बा ।

कैलारी गाउँपालिकाके अध्यक्ष राजसमझ चौधरीके अध्यक्षतामे हुइल बैठकमे उहाँ अइना बजेटमे लक्षित बर्ग कार्यक्रममे सीमान्तकृत समुदायहे समेटे पर्ना बटैलै । शान्ति परियोजनासे एकल तथा द्वन्दप्रभावित, पीडित महिलाके क्षेत्रमे मजा भूमिका खेलल कहटी वडा वडामे जैना बजेटमे उहाँहुकन समेटन अध्यक्ष निर्देश करलै । उहाँ कहलै, पालिकास्तरसे हुइना सहयोगफे जारी रही मने वडा वडामे जैना डल्लो बजेटसेफे ओइनहे समेटके लैजैना जरुरी बा ।

बैठकमे सहजीकरण करटी शान्ति परियोजनाके परियोजना संयोजक वेद अवस्थी परियाजनासे हुइल उपलब्धी सार्वजनिक करल रही । परियोजनासे कैलारी गाउँपालिकाके ९ वडामे एकल महिला द्वन्द्व पीडित तथा सीमान्तकृत करके जम्मा ११ ठो समुह संगठित हुइल बटैली । जेम्ने सदस्य संख्या ३६५ जाने बटै । एकल महिला सदस्य २२४ जाने, द्वन्द्वसे पीडित महिलाके संख्या ४६ जाने सीमान्तकृत महिला संख्याः ९५ जाने रहल बटै । परियोजनासे ३० जाने विपन्न एकल महिलाहुकनके निःशुल्क स्वास्थ्य परिक्षण करैना सफल, १५ जाने एकल महिलाहुक्रे परिवर्तनके बाहकके रुपमे सम्मानित हुइल बटै ।

एक जाने सीमान्तकृत महिलाहे २५ हजार अनुदान डेहुवैना सफल, २० जाने मनोसामाजिक समस्या रहल एकल, हिंसापिडित महिला, द्वन्दप्रभावित, सीमान्तकृत महिलाहुकनहे परामर्श डेहल बा । १५ जाने हिंसा पीडित महिलाहुकनहे न्याय डेहुइवा पहल करके न्यायमे पहँुच पुगाइल बा ।

कैलारी गाउपालिकाके ९ वडामे ११ जाने लोकल लिडर परिचालन करल, कैलारी गा।पा। वडा ४ कार्यालयसे सीमान्तकृत महिलाहुकनहे ४० हजार बजेट छुट्याइल, कैलारी गा।पा वडा वडासे बजेट छुट्याके कृषि समुह दर्ता कैगिल बा । मानव अधिकारको लागि महिला एकल महिला समुह ओ जर्मन सरकारके अर्थिक सहयोगमे संचालित परियोजना ‘सामाजिक सदभावका लागि जनताको सहभागिता’ कैलारी गा।पा। के रातो बुकमे पारल रहे ।

कैलारी गाउँपालिका वडा नं ६ मे शान्ति संग्राहलय निर्माण करके व्यवस्थापन कैगिल बा । विपन्न एकल महिला तथा सीमान्तकृत महिलाहुकनके १० जाने छात्राहुकनहे निःशुल्क छात्रवृत्ति वितरण कैगिल, कैलारी गाउपालिका ओ मानव अधिकारको लागि महिला एकल महिला समुह विच एकदम मजा समन्वय तथा सहकार्य रहल, यी वर्ष २ चो जर्मन एम्बेसी तथा समाज कल्याण परिषद के संयुक्त अनुगमन हुइल ओ सुझावमे एकदम मजा तथा कार्यक्षेत्र ओ सेवाग्राही सही छनौट हुइल कना बाट आइल बा । नाप टु समिति गठनफे हुइल बा ।

ओस्टेक परियोजना संयोजक अवस्थी परियोजना संचालन करेबेर चुनौतीफे रहल बटैली । उहाँ एकल महिला, द्वन्द्वपीडित, सीमान्तकृत महिलाहुकनके आर्थिक समस्या समाधान करनइसेकल ओरसे समुहमे सक्रिय करैना कठिन हुइल बटैली । एकल महिला, द्धन्द्धपीडित, सिमान्तकृत महिला सीपमुलक तालिम प्रदान करे नइसेकल, एकल महिला, द्वन्द्वपीडित, सीमान्तकृत महिलाके लाग नीतिगत तथा कार्यक्रममे प्रदेश जिल्ला ओ गाउँपालिकामे सम्बोधन कराई नइसेकल, एकल महिला, द्धन्द्धपीडित, सीमान्तकृत महिलाहुकनके सहि तथ्याक नइहुके कार्यक्रम तथा उहाँहुकनहे सक्रिय कराई नइसेकल बटैली ।

स्थानीय लिडरहुकनहे पारिश्रमिकके व्यवस्था तथा यातायातके सुविधा नइहुके परिचालन कैना कठिनाई हुइल बटैली । कार्यक्रममे वडा नम्बर २ वडा अध्यक्ष विकास चौधरी, वडा नम्बर ३ वडा अध्यक्ष सन्तराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेम बहादुर चौधरी, प्रमुख प्रशासकीय अधिकृत खगेन्द्रराज जोशी, शिक्षा विकास शाखाके प्रमुख गणेश प्रसाद मिश्र, सामाजिक विकास शाखा प्रमुख यगम कलेल, महिला तथा बालबालिका शाखा प्रमुख बालकुमारी चौधरीलगायतके सहभागिता रहे । कार्यक्रममे स्वागत मन्तव्य मानव अधिकारको लागि महिला एकल महिला समुहके जिल्ला अध्यक्ष भगवती हमाल करल रहिट ।