युनिक नेपालसे भुलहे बिमा रकम हस्तान्तरण
पहुरा समाचारदाता
हसुलिया, १ असार । नेपालके पहिल स्मार्ट सटिफिकेट प्राप्त पहिल बित्तीय संस्था युनिक नेपाल लघुवित्त वित्तीय संस्था लिमिटेड शाखा कार्यालय हसुलिया कैलालीसे एक कार्यक्रमके आयोजना करके समूह सदस्यहे ग्राहक संरक्षण कोष अन्तर्गत किरीया खर्च प्रदान करले बा । युनिक नेपाल लघुवित्त वित्तीय संस्था लिमिटेडसे कैलाली जिल्ला कैलारी गाँउपालिका वडा नं ०४ के गाँउ बैठना मीनादेवी भुलहे किरिया खर्च प्रदान करल हो ।
युनिक नेपाल लघुवित्त वित्तीय संस्था लिमिटेडके कार्यकारी निर्देशक तथा लघुवित्त विज्ञ डा. गोपाल दहितके अनुसार सदस्यसे ऋण लेहल वाफत गोसियक रु १०० के एक वर्षके बिमा करेबेर केलफे कौनो घट्ना हुके हाल युनिकसे रु ३० हजार समके किरिया खर्च सुविधा डेना ओ सदस्य कालगतिके कारण निधन हुइल हकमे १३५ प्रतिशत सुविधा प्रदान कैना करल बटैलै ।
एक कार्यक्रमके आयोजना करटी युनिक नेपाल लघुवित्त वित्तीय संस्था लिमिटेड ओ शाखा कार्यालय हसुलिया कैलालीसे उहाँक घरमे जाके किरिया खर्च तथा बिमा बाफतके रकम रु ३० हजार रुपैया प्रदान करल हो ।
उ कार्यक्रममे बोल्टी युनिक नेपाल लघुवित्त वित्तीय संस्था लिमिटेड शाखा कार्यालय हसुलिया कैलालीके शाखा प्रमुख निर्मल रैका समाजसेवी गम्भिरे भुलके निधनमे दुख व्यक्त करलै ।
मीनादेवी भुलके गोसिया गम्भीर भुलके ५२ वर्षके ंउमेरमे हृदयघातके कारण निधन हुइल रहे । उहाँक २ छाई ओ २ छावा रहल बा ।
युनिक नेपाल लघुवित्त वित्तिय संस्था लि से २०५७ सालसे पाछे पारल वर्ग थारु, दलित, मुस्लिम, आदिबासी, जनजाती, सीमान्तकृत समुदाय गरिबीके रेखा टरे रहल महिला डिडीहुकनहे लघुवित्त कार्यक्रमसे आर्थिक रुपमे सवलीकरण कैना तथा क्षमता अभिवृद्धि कैना ग्रामीण क्षेत्रमे कार्य करटी आइल बा ।
हाल युनिक नेपाल लघुवित्त वित्तीय संस्था लि. संग करिब ९० हजारसे ढेर महिला डिडीबहिनीया लघुवित्त सेवा लेटी समुहमे बैठल बटै । युनिक नेपाल लघुवित्त वित्तीय संस्था लि.से कैलाली, कञ्चनपुर, बांके, बर्दिया, दाङ, कपिलवस्तु करके ६ ठो जिल्लामे ४१ ठो शाखा मार्फत सेवा करटी आइल बा ।
