थारु भाषाके पाठ्यक्रम प्रवोधीकरण तालिम
सामुदायिक ओ निजी दुनु तहके विद्यालयमे थारु भाषा अनिवार्य लागु कैना बारबर्दिया नगरपालिका पहिल
पहुरा समाचारदाता
बर्दिया, ४ असार । बर्दियाके बारबर्दिया नगरपालिकासे तयार लिरौसी थारु भाषक स्थानीय पाठ्यक्रम बारबर्दिया गौरब (कक्षा १–३) के ३ दिने प्रवोधीकरण तालिम निम्जल बा ।
जेठ ३२ से असार २ गतेसम अंशुवर्मा उच्च मावि जयनगरमे हुइल पाठ्यक्रम प्रवोधीकरण तालिमके समापनके अवसरमे बारबर्दिया नगरपालिकाके नगर प्रमुख छविलाल थारु कहलै, ‘यी पालिकामे ७३ प्रतिशत थारुहुकनके बसोवास हुइल ओरसे थारु भाषाके पढाई सामुदायिक ओ निजी दुनु तहके विद्यालयमे अनिवार्य रुपसे लागु करे लागल हो ।’ थारु भाषाके पठनपाठनसे विद्यार्थी वर्गहे ज्ञान हासिल कैना और सहज हुइना उहाँक कहाई रहे ।
स्मरण रहे, बारबर्दिया नगरपालिकासे स्थानीय पाठ्यक्रम बारबर्दिया गौरब नेपाली भाषामे हाल पठनपाठन करटी रहल बा । अधिकांश विद्यार्थीहे स्थानीय पाठ्यक्रमफे नेपालीसे उल्था करके थारु भाषामे पढाई पर्ना अवस्थासे थारु भाषाके पुस्तकमे जोड डेहल बारबर्दिया नगरपालिकाके शिक्षा शाखा प्रमुख टीकानाथ गोसाईं बटैलै । सामुदायिक ओ निजी दुनु तहके विद्यालयमे थारु भाषा अनिवार्य लागु कैना बारबर्दिया नगरपालिका पहिल रहल उहाँ जानकारी डेलै ।
तालिमके समापनमे प्रशिक्षार्थीहुक्रे सुष्मासागर देवकोटा, जगतराम थारु, विष्णु चौधरीसे तालिम बहुट फलदायी रहल बटैलै । तालिममे १९ महिला तथा २२ पुरुष करके ४१ जानेक सहभागिता रहल रहे ।
तालिममे राधाकृष्ण थारु जनसेवा केन्द्र तथा प्लान नेपालके सहकार्य रहल रहे ओस्टेक करके, तालिमके प्रशिक्षकद्वय डा कृष्णराज सर्वहारी ओ नरेशकुमार चौधरी रहल रहिट ।
स्मरण रहे, लिरौसी थारु भाषक स्थानीय पाठ्यक्रम बारबर्दिया गौरब (कक्षा १–३) के सार्वजिनिकीकरण जेठ ३१ गते एक कार्यक्रमके बीच करल रहे । कार्यक्रमके बरका पहुना डा. गोपाल दहित, बारबर्दिया नगरपालिकाके नगर प्रमुख छविलाल थारु, उपप्रमुख रत्नकुमारी पाण्डे, प्रशासकीय अधिकृत धर्मराज न्यौपाने, लेखक डा कृष्णराज सर्वहारीलायतसे पाठ्यक्रम सार्वजनिक करल रहिट ।
