पोल ढलके विद्युत सेवा अवरुद्ध

पहुरा समाचारदाता
धनगढी, ६ असार । धनगढीके टमान स्थानमे विद्युत पोल ढलके विद्युत तथा सञ्चार सेवा अबरुद्ध हुइल बा ।

बुधके साँझ आइल हावापानीसे धनढीके टमान ठाउँमे विद्युत पोल ढलल् हो । हावाहुरीके कारण ६० से ढेर विद्युत पोल ढलल् नेपाल विद्युत प्रधिकरण धनगढी बितरण केन्द्र जनैले बा । केन्द्रसे धनगढी उपमहानरपालिकाके वडा नम्बर ७, १०, १२, १८ ओ चौमला क्षेत्रमे ६० पोलमे क्षति हुइल जनैले बा । विद्युतके पोल ढलल् स्थानमे बुधके साँझसे बिद्युत सेवा अबरुद्ध हुइल बा । जिहीसे स्थानीयहुक्रे समस्यामे परल बाटै ।

यहोर विद्युतके पोल ढलल् स्थान बाहेक अन्य स्थानमे बिद्युत सेवा आपुर्ति कैना काम हुइल विद्युत प्रधिकरण धनगढी बितरण केन्द्रके प्रमुख मिथलेश कुमार गोहीवार बटैलै ।

विद्युतके पोल ढलल् स्थानमे शुकके साँझसम विद्युत सेवा सुचारु हुइना प्रमुख गोहीवार जानकारी डेलै ।