सेती प्रादेशिक अस्पतालमे ९ सय ४९ जाने उपचार सेवा लेटी

पहुरा समाचारदाता
धनगढी, ६ असार । कैलालीके धनगढीमे विश्व सिकलसेल दिवस एक कार्यक्रमके विच मनागिल बा ।

सेती प्रादेशिक अस्पतालसे बुधके रोज पत्रकार सम्मेलनके आयोजना करके विश्व सिकलसेल दिवस मनैलक हो । आदिवासी जनजाती थारु समुदायमे सिकलसेल एनिमिया रोग गम्भीर चुनौतीके रुपमे रहल बटागिल बा । सेती प्रादेशिक अस्पतालके सिकलसेल एनिमिया फोकल पर्सन गौरी जोशी कैलाली जिल्लामे ६ सय ६५ ओ कञ्चनपुरमे दुई सय ६४ कैके नौं सय ४९ जाने सिकलसेल एनिमियाके विरह्म्य उपचार करैटी रलक जनाकारी डेलै । सरकारसे सिकलसेलके परीक्षण ओ उपचार निःशुल्क कैलेसेफे अलग्य उपचार कक्षके व्यवस्था नैहुके समस्या हुइटी रलक उहाँ बटैलै ।

सिकलसेल एनिमिया (रक्तअल्पता) पश्चिम नेपालमे जटिल रोगके रुपमे डेखल ओरसे यकर रोकथाम तथा नियन्त्रणके लाग स्थानीय, प्रदेश सरकार तथा सरोकारवाला निकायके भूमिका महत्वपूर्ण रना सेती प्रादेशिक अस्पतालके डा. प्रदिप मिश्र बटैलै । विशेष करके यी रोग थारू जातीमे बंशाणुगत रुपमे सरटी गैलक डेखा परटी आइल बटैलै ।

सरकारसे नीतिगत रूपमे सिकलसेल रोगीके उपचार कैना व्यवस्था करल बटैटी सेती प्रादेशिक अस्पतालके मेडिकल सुपरीटेन्डेन्ट डा. शेरबहादुर कमर परीक्षण ओ उपचार डुनु निःशुल्क रहल बटैलै । सरकारसे एक ठो बिरामीहे एक लाख बराबरके औषधि डेटी आइल बटैलै । प्रभाइभेट अस्पतालमे परीक्षणके लाग एक हजार शुल्क लग्ना करल ओरसे बस्ती–बस्तीमे जाके निःशुल्क परीक्षणके सुविधा डेहे सेक्लेसे रोग पत्ता लगैना सहजुल हुइना उहाँ बटैलै ।

सिकलसेल रलक व्यक्तिहे शरीर, हाडजोर्नी बठैना, कमलपित्त, रक्तअल्पता, घुमरी लग्ना, शरिर कमजोर लग्नालगायतके समस्या विल्गैना करल डा. कमर जानकारी डेले । सिकलसेल पोजेटिभ रलक दम्पत्तिसे जन्मल ९९ प्रतिशत बच्चामे सिकलसेल पोजेटिभ विल्गैना ओरसे सिकलसेलके जलम क्ुण्डली हेरके आबसे भोज कैना उहाँ सुझाव डेलै ।

सिकलसेलके अवस्था हेरेबेर कैलाली जिल्लाके कैलारी गाउँपालिकामे सबसे ढेर रहल बटै । सैती प्रादेशिक अस्पतालके तथ्यांक अनुसार यहाँ १५४ जाने सिकलसेल विमारी रहल बटै । धनगढी उपमहानगरपालिकामे १४७, गोदावरीमे ६४, गौरीगंगामे ५४ जाने घोडाघोडीमे ३७, बर्दगोरियामे ४५ जाने रहल बटै । ओस्टेक करके लम्की चुहामे २१, टीकापुरमे ३३, जानकीमे ४७, जोशीपुरमे ४३ ओ भजनी नगरपालिकामे ३९ जाने सिकलसेल विमारी रहल सेती प्रादेशिक अस्पतालके सिकलसेल एनिमिया फोकल पर्सन गौरी जोशी बटैलै ।

ओस्टेक कञ्चनपुरके बेलौरी नगरपालिकामे ८८, पुनर्वासमे २३, लालझाडीमे २४, कृष्णापुरमे ५६, बेलडाँडीमे २१, शुक्लाफाँटामे १४, बेदकोट १४ ओ भीमदत्त नगरपालिकामे २० जाने सिकलसेल एनिमियाके विमारी रहल उहाँ बटैलै ।