डिडब्लुआरएफसे टमान क्षेत्रके ५५ महिलनहे साइकल वितरण

पहुरा समाचारदाता
हसुलिया, ३ सावन । दलित महिला अधिकार मञ्च कैलालीसे कैलारी गाउँपालिका ओ गौरीगंगा नगरपालिकाके टमान क्षेत्रके महिलाहुकनहे ५५ ठो साइकल वितरण करले बा ।

डिसिएके आर्थिक सहयोगमे पहुँच परियोजनाके उपहार कार्यक्रम अन्र्तगत साइकल वितरण करल हो । विफेक रोज कैलारी गाउँपालिकाके अध्यक्ष राजसमझ चौधरीके वरका पहुनामे हुइल एक कार्यक्रमके विच टमान क्षेत्रके २५ जाने महिलाहुकनहे साइकल वितरण कैगिल बा ।

कार्यक्रममे सम्बोधन गाउँपालिका अध्ययक्ष राजसमझ चौधरी जौन प्रयोगके लाग साइकल डेहल हो उहे सदुपयोग कैना आग्रह करलै । उहाँ कहलै, ‘महिलाहुक्रे व्यापार व्यवसाय, कौनो ठाउँमे बैठकमे जाइक लाग यी साधानके प्रयोगसे सहजता नाने सेकी । संस्थासे डेहल हो कहिके नाही अपन मानके जतन करके चलैसे ढेर टिकाई सेक्जाई ।’

दलित महिला अधिकार मञ्च कैलालीसे सावित्रा घिमिरे सामुदायिक नेतृत्व करल महिला, मेलमिलापकर्ता, उद्यमी महिला ओ क्लाईमेट च्याम्पियन महिलाहुकनहे साइकल वितरण करल बटैली । उहाँ कहली, ‘टमान क्षेत्रके महिलाहुकनके कामकाजमे सहजता होए कना उद्देश्यसे साइकल वितरण करल हो, अपन लगानी रहलेसे माया रहठ, जहाँ अपन लगानी नैहो कलेसे वास्ता नैकैना प्रवृति रहठ ।’ संस्थाके डेहल हो कहिके नाही अपन मन्टी सही ठाउँमे प्रयोग कैना उहाँ आग्रह करली ।

कार्यक्रममे स्वागत तथा उद्देश्यबारे जानकारी संस्थाके व्यवस्थापक सृजना पराजुली करल रही । कैलारी गाउँपालिकामे टमान क्षेत्रके २५ जाने ओ गौरीगंगा नगरपालिकामे ३० जाने महिलाहुकनहे साइकल वितरण कैगिल बा । कार्यक्रमके संचालन दलित महिला अधिकार मञ्च कैलालीके कैलारी गाउँपालिका सहजकर्ता प्रिति चौधरी करल रही ।