प्रअहुकन गाउँपालिका अध्यक्ष कहलै,–‘शिक्षाके गुणस्तरमे सुधार ल्यानी जटराफे लगानी कैना तयार बाटी’
पहुरा समाचारदाता
हसुलिया, ४ सावन । कैलारी गाउँपालिकाके अध्यक्ष राजसमझ चौधरी विद्यालयके प्रअहुकनके गुणस्तरीय शिक्षामे ध्यान डेना निर्देशन डेले बटै ।
कैलारी गाउँपालिका शिक्षा शाखाके आयोजनामे शुकके रोज हसुलियामे हुइल प्रअ बैठक तथा शिक्षाके अवस्थाबारे अन्तरक्रिया कार्यक्रममे उहाँ उ निर्देशन डेहल रहिट । उहाँ कहलै,‘ कैलारी गाउँपालिकाके ७१ करोड बजेट रहलमे २२ करोड २० लाख शिक्षा क्षेत्रमे लागनी हुइल बा । अब्बे एसईई परिक्षाफल हेरेबेर निराशजनक आइल बा । यिहे रबैया रहलेसे लगानी बालुमे पानी डारेहसक हुई सेकी ।’
दुई बर्ष यहोर पालिकाभिटरके विद्यालयमे माग अनुसार भौतिक पूर्वाधार ठप कैगिल बा,’ गाउँपालिका अध्यक्ष कहलै, ‘भौतिक पूर्वाधारमे सम्पन्न मने विद्यार्थी घटटी जैना एसइईके परिक्षाफल कम्जोर हुइटी जैना केकर कमी कम्जोरी हो । विद्यार्थी घटलपाछे विद्यालय समायोजनफे कैगिल बा । टमान विद्यालयमे विद्यार्थीके अनुपातमे शिक्षक संख्या ढेर रहल बा ।’
उहाँ कहलै, ‘एक ओर विद्यालय समायोजन हुइटी जैना, दुसर ओर विद्यार्थी हेरैटी जैना ओरसे अन्तमे विद्यालय नइरहलेसे शिक्षकफे हेराई सेक्ठै । ओकर लाग शिक्षकसे गुणस्तरीय शिक्षामे ध्यान डेठे पर्ना जरुरी बा ।’
गाउँपालिका अध्यक्ष कहलै, ‘विद्यालयके शैक्षिक अवस्थामे सुधार ल्यानी पालिकासे वडा वडामे कैजैना ग्राभेलके बजेटफे शिक्षामे लगानी करे सेक्जाई । शिक्षकहुकनके सरुवा आवश्यकताके आधारमे कैजाई, शिक्षाके गुणस्तर सुधारके लाग बनाइल कार्यदलके म्याण्डेड अनुसार आघे बह्र जाई ।’
वडा नम्बर ५ के वडा अध्यक्ष विष्णु प्रसाद चौधरी सामुदायिक विद्यालयमे शैक्षिक गुणस्तर खस्कटी गैल ओरसे सक्कु जाने आ अपन कमीकम्जोरी सुधार करके आघे बह्रना सुझाव डेलै । उहाँ कहलै, ‘विद्यालयके शैक्षिक अवस्था कम्जोर हुइना शिक्षक, अभिभावक, विद्यार्थीके कमी कम्जोरी बा । विद्यालयके अनुगमनके क्रममे शिक्षकहुकनके कमी कम्जोरी डेखल बा ।’
वडा नम्बर ४ के वडा अध्यक्ष ठागुराम चौधरी सपना बहुमुखी डेखना मने अवस्था हेरेबेर कक्षा ११ संचालन कैनाफे कर्रा रहल बटैलै । अब्बे चाही शिक्षक अभिभावकहुक्रे विद्यार्थीन उप्पर ध्यान नइडेहल कारण अवस्था खस्कटी गैल बटैलै । विदा ढेर हुइल कना गुनासो आइल ओरसे आब फजुल विदा कटौटी कैना बटैलै ।
कार्यक्रममे कैलारी गाउँपालिका शिक्षा शाखाके प्रमुख गणेश प्रसाद मिश्र एसईई परिक्षाफल कम्जोर विल्गैटी ओरसे कक्षा ११ संचालन कैना कर्रा हुइल बटैलै । उहाँ कहलै, ‘जौन विद्यालयमे कक्षा ११ ओ १२ संचालन हुइटी आइल बा । उ विद्यालयके ४ से १० जाने केल पास हुइट बटै उ विद्यालय कैसिक प्लस टु संचालन हुई ।
एसईईके परिक्षाफल गैल बरससे यी आउ कम हुइल शाखा प्रमुख मिश्र बटैलै । उहाँ कहलै, ‘२०८० सालके एसईईमे ५६७ जाने विद्यार्थी सहभागी हुइलमे ७३ जाने केल पास हुइल बटै । जेम्ने दिपेन्द्र माविमे १४ जाने, राष्ट्रिय मावि विचैपुरमे १४ जाने, जनता मावि गदरियामे ५ जाने, जनकल्याण मावि पवेरामे ४ जाने, लक्ष्मी मावि पृथ्वीपुरमे ४ जानेके पास हुइल शिक्षा शाखा प्रमुख मिश्र बटैलै । यी सक्कु विद्यालयमे कक्षा ११ ओ १२ संचालन हुइटी आइल बा ।
ओस्टेक करके सरस्वती मावि खरुवाखेरामे ३, जानकी मावि वनकट्टामे ३, जनकल्याण मावि के गाउँमे १ जाने, राष्ट्रिय मावि भुइयाँफाटामे शुन्य रहल उहाँ जनैै । ओस्टे संस्थागत विद्यालय ब्राइटस्टर ई बोडिङमे १०, कालिका ई बोडिङ स्कूलमे ८ जाने ओ नगेश पशुपति शिक्षा मन्दिरमे ७ जाने पास हुइल उहाँ बटैलै ।
अन्तरक्रिया कार्यक्रममे राष्ट्रिय आवि बसन्ताके प्रअ डम्बर बहादुर शाह सामाजिक संजालमे विद्यार्थीके आर्कषणके कारण पह्राईमे खासे ध्यान नइडेहल बटैलै । ब्राइट स्टार ई बोडिङके प्रअ मनि प्रसाद चौधरी संस्थागत विद्यालयकेफे मल्यांकन कैना आग्रह करलै । जानकी मावि बनकट्टाके प्रअ उपेन्द्र भण्डारी विद्यालयमे टिम मजा हुइलेसे शिक्षामे गुणस्तर नाने सेक्ना बटैलै । उहाँ विषयगत शिक्षकके आवश्यकता रहलफे बटैलै ।
जनता मावि गदरिया प्रअ सिताराम चौधरी राज्यके ढुकुटीसे तलब खैना मने गुणस्तरीय शिक्षा डेहे नइसेक्ना गम्भीर बाट रहल बटैलै । यी बरसके एसइइ परिक्षाफल कम्जोर विल्गाइल ओरसे टरहीसे सुधार करेपर्ना सुझाव डेलै । जनकल्याण मावि पवेराके प्रअ जगन्नाथ चौधरी विद्यालयमे पाठयक्रम अनुसार पह्राई नइहुइना, शिक्षाके लाग बातावरण नइमिल्ना ओ विदा ढेर हुइल कारण तोकल दिन पह्राई नइहुइल बटैलै । उहाँ विदा कटौटी करके विद्यालय खुल्ना पह्रैना दिन बह्राई पर्ना बटैलै ।
राष्ट्रिय मावि विचैपुरके प्रअ जीतबहादुर रावत आन्तरिक परिक्षा मुल्यांकन ओ राष्ट्रके शिक्षा नीतिमे तुटि डेखल कारण गुणस्तरीय शिक्षा प्रदान हुई नइसेकल बटैलै । कार्यक्रममे वडा अध्यक्षहुक्रे, प्रमुख प्रशासकीय अधिकृत खगेन्द्र राज जोशी, गाउँपालिका भिटर सक्कु विद्यालयके प्रअहुकनके सहभागिता रहल रहे ।
