गुरु पूर्णिमाके अवसरमे वक्तृत्वकला
पहुरा समाचारदाता
धनगढी, ६ सावन । धनगढीके सुदूरपश्चिमाञ्चल एकेडेमी एसपीए कलेजमे गुरु पूर्णिमा मनाइल बा । अँट्वारके सुदूरपश्चिमाञ्चल क्याम्पस विद्यार्थी परिषद्के आयोजनामे उ कार्यक्रम मनाइल हो ।
गुरु पूर्णिमाके अवसर पारके गुरुहुक्रनके सम्मानमे आयोजना करल गुरु पूजन तथा वक्तृत्वकला कार्यक्रममे कलेजमे अध्यापन करैटी रहल शिक्षकहुक्रनहे डायरी, डटपेन ओ पुष्प गुच्छा प्रदान करल रहे । ओस्टके मिठाई खवाके सम्मान भाव प्रकट करल ओ वक्तृत्वकला कार्यक्रम समेत सञ्चालन करल सुदूरपश्चिमाञ्चल क्याम्पस विद्यार्थी परिषद्के अध्यक्ष कृष्ण पुजारा बटैलै ।
ओस्टके उहे अवसरमे सम्पूर्ण प्राध्यापक, शिक्षकहुक्रनके प्रतिनिधित्व कैटी एसपीए कलेजके बि.ए., बि.एड. तथा एम.एड संकायके विभागीय प्रमुख उपप्रा.डा देवेन्द्र प्रसाद भट्ट दीप्त विद्यार्थीहुक्रनके सम्मान भावसे हर्षित बनाइल बटैटी उ अवसरके लाग धन्यवाद ज्ञापन करल रहिट ।
उहे अवसरमे आयोजित वक्तृत्वकला कार्यक्रममे बि.बि.एस पहिल बरसमे अध्ययनरत दमयन्ती धामी, दीपिका बोगटी, यशोदा जोशी, कक्षा १२ मे अध्ययनरत आशिका पोख्रेल ओ हिमानी चन्द सहित पाँच जाने भाग लेहल रहिट । कलेसे यशोदा जोशी पहिल, आशिका पोख्रेल डुसरा, दमयन्ती धामी टिसराा ओ दीपिका बोगटी सान्त्वना पुरस्कार प्राप्त कैना सफल हुइल रहिट ।
वक्तृत्वकला कार्यक्रममे निर्णायकके भूमिकामे एसपीए कलेजमे कार्यरत उप–प्राध्यापक ऐन जप्रेल, टंक जोशी ओ रमेश जोशी रहल रहिट ।
