मानव अधिकार समुह तथा नागरिक विच वातावरण अधिकार सम्बन्धी छलफल
पहुरा समाचारदाता
धनगढी, ११ सावन । मानव अधिकार समुह तथा नागरिक विच वातावरण अधिकार सम्बन्धी छलफल हुइल बा ।
इन्सेक कार्यालय सुदूरपश्चिम प्रदेशके आयोजना तथा डिसिएके सहयोगमे मानव अधिकार समुह तथा नागरिक विच वातावरण अधिकार सम्बन्धी छलफल हुइल हो । मनसुन सुरु हुइलसंगे बाढ पहिरोके कारण धनजनके क्षति हुइटी रहल ओरसे मानव अधिकार समुह तथा नागरिक विच वातावरणके अवस्थाबारे छलफल हुइल रहे ।
इन्सेक सुदूरपश्चिम प्रदेश संयोजक खडकराज जोशी कार्यक्रमके सहजीकरण करटी असार ओ सावनमे आइल बाढसे कैलाली, कञ्चनपुरमे टमान जनधनके क्षति पुगाइल बटैलै । बाढके कारण लडिया तटिया क्षेत्रके स्थानीय ढेर प्रभावित हुइल ओ बाढ आइलबेला विस्थापित हुइ परल अवस्था रहल बटैलै ।
छलफल कार्यक्रममे मानव अधिकार समुह पुनर्वासके रुपेश खरेल बाढके कारण पुनर्वासके टमान घर बाढसे प्रभावित हुइल ओ धानबाली, उखुवाली दोदा लडियासे सखाप बनाइल बटैलै ।
मानव अधिकार समुहके टेकराज ओझा, मानव अधिकार समुह लालझाडीके संयोजक सोमनाथ राना, मानव अधिकार समुहके गोविन्द सापकोटा, मानव अधिकार समुह कैलारीके संयोजक मानबहादुर चौधरी लगायतसे आ अपन स्थानीय तहमे बाढसे पुगाइल क्षतिबारे जानकारी कराइल रहिट । ओस्टेक दलित महिला अधिकार मञ्चके व्यवस्थापक सृजना पराजुली बाढके कारण पीडितके तथ्याङक पैना कर्रा हुइल बटैली । उहाँ कहली, ‘बाढसे प्रभावित ओ पीडितके सही तथ्याङक नैहुइलपाछे सहयोगके लाग सिफारिस कैनाफे कर्रा हुइठ ।’
कार्यक्रममे राष्ट्रिय मानव अधिकार आयोगके सुदूरपश्चिम प्रदेश प्रमुख हरि प्रसाद ज्ञवाली सरुवाहुके लुम्बिनी प्रदेशमे जैटी रहल ओरसे उहाँहे मानव अधिकार समुहसे विदाई कार्यक्रम कैगिल बा । उहे अवसरमे अवसरमे उहाँ सुदूरपश्चिम प्रदेशके बसाई मजा रहल ओरसे सम्बन्ध समन्वय सदैव रना बटैलै ।
