सेवा प्रवाहबारे जानकारी नैहुके पीडितके मुद्दा डबजाइठः गाउँपालिका अध्यक्ष
पहुरा समाचारदाता
हसुलिया,१४ सावन । हिंसा पीडित महिला तथा बालबालिकाके लाग सेवाके नक्शांकन ओ सिफारिस संयन्त्रबारे छलफल करके उ निर्देशिकाहे कैलारी गाउँपालिकाके कार्यपालिकाके अइना बैठकसे अनुमोदन कैना निर्णय कैगिल बा ।
कैलारी गाउँपालिकाके आयोजना तथा सामुदायिक विकास केन्द्र डोटीके सहकार्यमे ‘किशोरी शसक्तीकरण परियोजना’ अन्र्तगत कैगिल गतिविधिके समिक्षा ओ हिंसा पीडित महिला तथा बालबालिकाके लाग सेवा प्रवाहके नक्शांकन, सिफारिस संयन्त्रबारे छलफल कैगिल हो ।
गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे उहाँ ंिहसा पीडितहुक्रे सेवा प्रदायक सस्थाबारे जानकारी नैहो सेवा लेना कर्रा हुइल बटैलै । उहाँ कहलै, ‘कोई महिला तथा बालबालिका ंिहंसामे परेबेर होसहवास नैफे रहेसेकठ । सेवा प्रदायक संघ संस्था के के हो, झवट्टा पत्ता नैहुइसेकठ । जेकर कारण मुद्दा दर्ता कैना समयसीमा नाघल कारण दर्ता नैहुइठ, प्रमाण मेटे सेकठ ।’
गाउँघरमे लैङिक हिंसाके ढेर घटना रहठ,’ गाउँपालिका अध्यक्ष कहलै,‘जे कम्जोर रहठ उहीहे ढेर हिंसा हुइठ । पीडक जबफे बल्गर रहठ, पीडित कम्जोर रहठ । घटना बाहेर आइलपाछे कोई आर्थिक पावर टे, कोई राजनीतिक पावरसे पीडितके मुद्दा डवाजाइठ ।’ उ परियोजना अन्र्तगत हिंसा पीडित महिला तथा बालबालिकाके लाग सेवा प्रदायकहुकनके नक्शांकन ओ सिफारिस संयन्त्र बनागिल बा, ओकर बारेमे जानकारी डेहे पर्ना जरुरी रहल गाउँपालिका अध्यक्ष बटैलै ।
कार्यक्रममे सहजीकरण करटी गाउँपालिकाके सामाजिक विकास शाखा प्रमुख यगम कलेल जोखिममे रहल महिला तथा बालबालिकाहुकनहे आवश्यक सरक्षण ओ पुनस्र्थापनाके लाग टमान सेवा प्रदान करेक लाग जिल्ला तथा स्थानीय तहमे टमान सरकारी तथा गैरसरकारी निकायसे सेवा प्रदान करटी रहल जानकारी डेलै । टमान सरकारी तथा गैरसरकारी निकायसे प्रदान करटी रहल सेवाके बारेमे सक्कुहुनहे जानकारी हुइना आवश्यक रहल उहाँ बटैलै ।
जानकारीके कमी वा बालबालिकाके क्षेत्रमे काम कैना नगरपालिका, गाउँपालिका तथा जिल्लास्तरमे रहल टमान सरकारी तथा गैरसरकारी निकायके बीच समन्वयके अभावसे महिला ओ बालबालिकासे पैना सेवासे बञ्चित हुई नपरे कना सुनिश्चित करेक लाग टमान सरकारी तथा गैरसरकारी संस्थासे प्रदान कैना उपलब्धबारे जानकारी ओ सेवाके नक्साकन कैगिल उहाँ जनैलै । कार्यक्रममे हिंसाके प्रकारबारे जानकारी डेटी कानूनी उपचार, पुनस्र्थापना, औषधीउपचारबारेके सम्पर्क सेवा प्रदायक संस्था ओ सम्पर्क व्यक्तिनके फोन नम्बरसमेट जानकारी करल बा ।
छलफल कार्यक्रममे वडा नम्बर ५ के वडा अध्यक्ष विष्णु प्रसाद चौधरी, महिला तथा बालबालिका शाखाके प्रमुख बालकुमारी चौधरीलगायत अपन सल्लाह ुुसुझाव डेहल रहे ।
कार्यक्रममे प्रमुख प्रशासकीय अधिकृत खगेन्द्रराज जोशी, वडा नम्बर १ अध्यक्ष धोजहरिपाल बोहरा, वडा नम्बर २ के अध्यक्ष विकास चौधरी, वडा नम्बर ३ अध्यक्ष सन्तराम चौधरी, वडा नम्बर ४ के अध्यक्ष ठागुराम चौधरी, वडा नम्बर ५ अध्यक्ष विष्णु प्रसाद चौधरी, वडा नम्बर ६ के कावा अध्यक्ष महाविर चौधरी, वडा नम्बर ८ के अध्यक्ष तारामल कठरिया, सामुदायिक विकास केन्द्रके कार्यक्रम अधिकृत करुणा चौधरी, तिलक चौधरी, इलाका प्रहरी कार्यालयके प्रमुख लोकन्द्रबहादुर चन्द, गाउँपालिकाके टमान शाखाके प्रमुखलगागत सेवा प्रदायक संघ संस्थाके प्रतिनिधिहुकनके उपस्थिति रहे ।
