चैतन्य पाठशालासे खिर खैना कार्यक्रम कैगिल
पहुरा समाचारदाता
धनगढी, १५ सावन । कैलाली जिल्लाके धनगढी उपमहानगरपालिका–५ शिवनगरमे रहल चैतन्य पाठशालासे मंगरके रोज खिर खैना कार्यक्रम केैगिल बा ।
सावन १५ अर्थात खिर खैना दिनके अवसरमे विद्यालयके शिक्षक, प्रशासन ओ शिक्षक अभिभावक संघ विच शुभकामना अदानप्रदान करटी खिर खैना कार्यक्रम कैगिल हो ।
विद्यालयके प्रिन्सिपल कटकबहादुर्र िसंह बालबालिकाहे शिक्षा संग्गे संस्कार ओ संस्कृतिबारे जानकारी डेना कला, संस्कृति पुस्तान्तरण कैना जरुरी रहल बटैलै । उहाँ कहलै, ‘चैतन्य पाठशाला हरेक समुदायके चाड पर्व, रिति संस्कृतिहे एक्के नजरसे हेरल ओ सक्कु समुदायके संस्कृतिहे विद्यालयमे मनैटी ओकरबारे विद्यार्थीनहे जानकारी डेटी आइल बटी ।’
कौनोफे रिति संस्कृति, परम्परा, टरटिहुवारहे किताबमे पह्रैना संगसँगे व्यवहारहे कार्यान्वयन करके डेखैना प्रसाय करल प्रिन्सिपल सिंह बटैलै । उहाँ विद्यालयके क्याण्लेडरमे टरटिहुवार रिति संस्कृतिहे समावेश करटी उहीहे व्यवहारमे नन्ना प्रयास जारी रहल बटैलै ।
विद्यालयके शिक्षक अभिभावक संघके अध्यक्ष ईश्वर गिरी खिर खैना कार्यक्रमके आयोजनाके खास उद्देश्य संस्कृति संस्कारहे जर्गेना संग्गे विद्यालयके शिक्षक ओ शिक्षक अभिभावक संघके सम्बन्ध बल्गर बनैटी संस्कारसहितके शिक्षामे जोर डेना रहल बटैलै ।
कार्यक्रममे विद्यालय प्रशासन, शिक्षक अभिभावक संघके सदस्य, शिक्षक शिक्षिकाहुकनके सहभागिता रहल रहे । कार्यक्रमके संचालन विन्दास बम करल रहिट ।
