घाहिल महिलाके मृत्यु, पहिचान हुइना बाँकी

पहुरा समाचारदाता
धनगढी,१७ सावन । कैलालीके गोदावरी नगरपालिका वडा नं. ०५ गेटा स्थित मेडिकल कलेजके मुल गेटमे घाहिल अवस्थामे फेला परल महिलाके उपचारके ज्यान गैल बा ।

बुधके रोज साँझ साढे ६ बजेक समयमे जिल्ला कैलाली गोदावरी नगरपालिका वडा नं. ०५ गेटा स्थित मेडिकल कलेजके मुल गेटसे अन्दाजी १५ मिटर भिटर जैना डगरमे नामथर वतन नैखुलल बर्ष अन्दाजी ३५÷४० के महिलाके मुरीक पाछेक भागमे चोट लागके घाहिल अवस्थामे बाटी कना प्रहरीहे खबर कैगिल रहे ।

उ अस्पतालके कर्मचारीसे प्रहरी चौकी गेटामे जानकारी करैटीकी उ स्थानमे प्रहरी टोली तत्काल खटके घाहिल महिलाहे उपचारके लाग पदमा अस्पताल अत्तरियामे पठाइल रहे ।

सामान्य उपचार पश्चामत थप उपचारके लाग सेती प्रादेशिक अस्पताल धनगढीमे पठाइलमे रातके सावा आठ बजेक समयमे घाहिल महिलाके सेती प्रादेशिक अस्पताल धनगढीमे उपचारके क्रममे मृत्यु हुइल बा ।

उ महिलाके मृतक लाश अस्पतालके लाश घरमे धारल ओ लाशके हालसम सनाखत हुई नैसेकल ओरसे पहिचान हुइलेसे सम्बन्धित व्यक्तीसे जिल्ला प्रहरी कार्यालय तथा तथा लग्गेक प्रहरी कार्यालयमे सम्पर्क रख्न अनुरोध करले बा ।