उद्यमी महिलाहुकनके लाग लैङिक मुल्य मान्यता ओ सामाजिक समावेशी तालिम सुरु
पहुरा समाचारदाता
धनगढी, १७ सावन । उद्यमी महिलाहुकनके लाग लैङिक मुल्य मान्यता ओ सामाजिक समावेशी तालिम विफेक रोजसे सुरु हुइल बा ।
‘कोभिड–१९ पछि महिलाहरुको दिगो जीविकोपार्जनमे पहुँच वृद्धि, आर्थिक पुनस्र्थापना र उत्थानशिल परियोजना’ अन्र्तगत सभा नेपाल ओ यूएन वुमनके सहयोगमे मानव अधिकारका लागि महिला एकल महिला समुहके आयोजना दुई तालिमके हुइटी रहल बा । धनगढी उपमहानगरपालिकाके नगर उपप्रमुख कन्दकला रानाके बरका पहुनामे हुइल कार्यक्रममे उहाँ उद्यमी तथा टिना व्यवसायी महिलाहुक्रे अपन अधिकारके नेतृत्व तहमे आघे बह्रे पर्ना बटैली । उहाँ कहली, ‘महिला डिडीबाहिनीया बहुट मेहनत करके टिना उत्पादन करठै । फाइदा लेनाबेर विचोलियाके हात परजाइठ । अपन टिनाके मोल अपनही तोके नैपैना, उत्पादन लागत मोल नैपैना समस्या बा ।’
धनगढीमे टिना व्यवसायी महिला डिडीबहिनीयाहुकनके विक्री वितरणमे सहजता होए कहटी किसान कार्डके व्यवस्था सहित धनगढीमे वडा नम्बर ८ ओ १७ मे कृषि हाट बजारके व्यवस्था करल उहाँ बटैली ।
एकल महिला आर्थिक रुपमे केल सम्पन्न होके नैहुइठ, उहाँ कहली, ‘मोर घरमेफे मोर जेठीनीया एकल महिला हुइट । नीजि जीवन ओ सामाजिक जीवन सहज रुपमे बाँचेक लाग हौसलाके आवश्यकता बा । सम्पति केल भारी बाट नैहो माया ममता आदर्शके आवश्यकता परठ । सरकार गम्भीर हुके हेरे पर्ना रहठ । उहाँहुक्रे करल उद्योग व्यवसायके अवस्था का बा । सरकारहे ध्यान जाई पर्ना जरुरी बा । सूचना, शिक्षा स्वास्थ्य, न्यायमे पहुँच, हिंसा पीडितहे सीप विकास, वित्तीय साक्षरता, मनोपरामर्शलगायतमे ध्यान डेहल उपमहानगरपालिकासे काम करटी रहल नगरउपप्रमुख राना बटैली ।
कार्यक्रममे धनगढी उपमहानगरपालिका वडा नम्बर २ के अध्यक्ष धर्मराज ओझा, वडा नम्बर ३ के अध्यक्ष राजबहादुर ऐर उद्यमी महिलाहुकनके लाग मेरमेराइक तालिम तथा सीपमुलक आयमुलक कार्यक्रम नाने पर्ना आवश्यक रहल बटैले रहिट ।
मानव अधिकारका लागि महिला एकल महिला समुहके जिल्ला अध्यक्ष भगवती हमालके अध्यक्षतामे हुइल कार्यक्रममे स्वागत तथा परियोजनाके उद्देश्यबारे जानकारी सभा नेपालके परियोजना संयोजक दलबहादुर ओली जानकारी डेहल रहिट ।
कार्यक्रमके संचालन मानव अधिकारका लागि महिला एकल महिला समुहके परियोजना संयोजक वेद अवस्थी करल रहिट । सावन १७ ओ १८ गते दुई दिन संचालन रना तालिम महिला मानव अधिकारकर्मी गोमा आचार्य, धनगढी उपमहानरपालिकाके नगर उपप्रमुख कन्दकला राना, मिना जोशी डेटी रहल बटै । तालिममे लिङ ओ लैैगिंकता स्थानीयतहमे महिला सहभागिता ओ उद्यमी महिलासे पैना विशेष सुविधा सम्बन्धी व्यवस्था, सामाजिक समावेशीकरण ओ अन्तर विभाजकता, सामाजिक मुल्यमान्यता, मुल्यमान्यताके रुपान्तरण ओ सामाजिक सामाजिकीकरणबारे तालिम डेजैटी रहल बा ।
ओस्टेक करके लैङिक विश्लेषण (लैङिक भुमिका, महिलाके अवस्था, पहुँच ओ नियन्त्रण, लैङिक आवश्यकता, लैङिकतामे आधारित हिंसा ओ भेदभाव, लैङिक समानता ओ महिला सशक्तिकरण, महत्व ओ यकर सूचकबारे पहिल दिन तालिम डेहल बा ।
दुसरा दिन शुकके रोज राष्ट्रिय अन्तर्राष्ट्रिय कानूनी व्यवस्था, उद्यमशिलताके परिचय ओ बजार पद्धतिमे महिला नेतृत्व, लैङिक दृिष्टकोणसे मूल्य श्रृख्ला नक्सांकन, मूल्य श्रृख्लाके सामनामे लैगिंक चुनौती, अर्थमञ्चमे महिला सहभागिता तथा सञ्जालीकरण ओ दिगो विकास लक्ष्य, आत्मजागरण ओ आर्थिक सशक्तिकरण विषयमे तालिम प्रदान करल वेद अवस्थी बटैली ।
