सुदूरपश्चिमके मुख्यमन्त्रीमे दुसरा फेरा शाह नियूक्त
पहुरा समाचारदाता
धनगढी, २० सावन । सुदूरपश्चिम प्रदेशके मुख्यमन्त्रीमे प्रदेशसभा सदस्य माननीय कमलबहादुर शाह नियूक्त हुइल बटै ।
प्रदेश प्रमुख नजिर मियाँ अँटवारके रोज नेपालके संविधानके धारा १६८ के उपधारा २ बमोजिम प्रदेशसभा सदस्य शाहहे सुदूरपश्चिम प्रदेशके मुख्यमन्त्रीमे नियूक्त करलक हुइट । नेपाली काँग्रेससे प्रतिनिधित्व कैलक शाह दुसर फेरा सुदूरपश्चिम प्रदेशके मुख्यमन्त्री मन्त्री बनलक हुइट । वहाँहे नेकपा एमाले ओ नागरिक उन्मुक्ती पार्टीके फे समर्थन रहल बा ।
नेपाल कम्युनिष्ट पार्टी (एमाले) संसदीय दलके नेता माननीय राजेन्द्रसिंह रावल प्रदेश प्रमुख नजिर मियाँसे सावन १८ गते नेपालके संविधानको धारा १६८ के उपधारा (२) बमोजिम दुई वा दुई से ढेर दलके समर्थनमे प्रदेश सरकार गठन करेक लाग सावन २० गते भिटर दावी पेश कैना आव्हान हुइलमे उहे समयसीमा भिटरे प्रदेश सभा सदस्य तथा नेपाली काँग्रेस पार्टीके संसदीय दलके नेता माननीय कमलबहादुर शाहहे मुख्यमन्त्री पदमे अपनेहुकनके समर्थन रहल पत्र प्रदेश प्रमुख मियाँहे बुझाइल रहिट ।
हस्ताक्षरकर्ता दलहुकनके प्रतिनिधित्व कैना प्रदेश सभा सदस्य संख्या कुल प्रदेश सभा सदस्य संख्याके बहुमत रहल ओरसे नेपालके संविधानके धारा १६८ के उपधारा (२) अनुसार मुख्यमन्त्री पदमे माननीय शाहहे नियुक्ति करडेना रावलसे अनुरोध करल रहिट । सुदूरपश्चिम प्रदेशमे नेपाली काँग्रेसके १८ जाने प्रदेश सभा सदस्य संख्या, नेपाल कम्युनिष्ट पार्टी (एमाले)के प्रदेश सभा सदस्य संख्या ११ ओ नागरिक उन्मुक्ती पार्टीके ७ जाने प्रदेशसभा सदस्य रहल बटै ।
