मुख्यमन्त्री शाह विश्वासके मत पैलै
पहुरा समाचारदाता
धनगढी, ३० सावन । सुदूरपश्चिम प्रदेशके माननीय मुख्यमन्त्री कमलबहादुर शाह विश्वासके मत पैल बटै ।
नेपालके संविधानके धारा १६८ क उपधारा (२) बमोजिम नियुक्त हुइल मुख्यमन्त्री शाह बुधके रोज प्रदेश सभाके बैठकमे विश्वासके मत लेहल रहिट । उहाँहे काँग्रेसके १८, एमालेके ११ ओ नागरिक उन्मुक्ती पार्टीके ७ सात जाने प्रदेशसभा सदस्यके मत पैले बटै । विश्वासके मत पाइक लाग २७ मत हुइलेसे पुग्ना रहे । ५३ जाने प्रदेशसभा सदस्य रहलमे मुख्यमन्त्रीके पक्षमे ३६ मत ओ विपक्षमे ८ मत रहल बा कलेसे एक मत तथस्टमे परल बा ।
सुदूरपश्चिम प्रदेशके मुख्यमन्त्री कमलबहादुर शाह विकासके पहिल आधार राजनीतिक स्थिरता रहल बटैले बाटै । प्रदेश सभामे बुधके सम्बोधन कैटी उहाँ ओइसीन बटाइल हुइट ।
राजनीतिक स्थायित्व, सुशासन ओ विकासके लाग लावा राजनीतिक सहमति हुइल मुख्यमन्त्रीके कहाइ रहल बा । मुख्यमन्त्री शाह राजस्व संकलनमे डेखल समस्या समाधान हुइटी रहल जनैटी बजेटके समस्या फेन हाली निकास डेना प्रयासमे प्रदेश सरकार रहल उल्लेख करलै । “विनियोजन ऐन ओ आर्थिक ऐन पास कैके हाली चालु ओ पुँजीगत खर्च आघे बह्राब”, उहाँ कहलै ।
मुख्यमन्त्री अपने भ्रष्टाचार नैकैना ओ औरे जनहनहे फेन करे नैडेना प्रतिवद्धता जनाइल रहिट । उहाँ भ्रष्टाचार करुइयाहे कारबाही कैना उल्लेख करलै ।
