अनुदानके नाउँमे कुहीहे पैसा नैडेना किसानहुकन कैलारी गाउँपालिकाके अपिल

पहुरा समाचारदाता
हसुलिया, ३१ सावन । कैलारी गाउँपालिकाके किसानहुकनहे कृषि उपकरण (सिचाई मोटर तथा पावर टेलर) अनुदानमे वितरण कैना कहिके कुछ समुहसे अभिनफे रकम असुल्ना काम हुइटी रहल कना सूचना प्राप्त हुइल ओरसे किसानहुकनहे अनुदानके नाउँमे पैसा जमा नैकैना गाउँपालिकासे अपिल कैगिल बा ।

गाउँपालिका अध्यक्ष राजसमझ चौधरी कहलै, ‘यी पालिकाके किसानसे टमान संघ संस्था तथा व्यक्तिसे रकम संकलन करल सन्र्दभमे उ कार्यमे समस्या डेखल रहे । उहीहे टमान निकाय, संघ÷संस्था, राजनितिक दल ओ नागरिक समाजसे प्राप्त सहयोग तथा समन्वयसे समाधान हुइल बा । ओकर लाग हार्दिक धन्यवाद आभार व्यक्त करटु ।’

यैसिन प्रकृतिके कार्यमे डेखल जटिलताके बावजुतफे कुछ समुह तथा व्यक्तिहुक्रे किसानहे अनुदानमे कृषि उपकरण तथा अन्य सामाग्री उपलब्ध कैना कहिके रकम संकलन हुइटी रहलमे कैलारी गाउँपालिकासे यी आघे सावन ९ गते सम्वन्धित सक्कुहुनके जानकारीके लाग सार्वजनिक सूचना मार्फत अपिल करल गाउँपालिका अध्यक्ष कहलै ।

अभिनफे यैसिन प्रकृतीके कार्य हुइटा कना सूचना प्राप्त हुइल कहटी विफेक रोज सार्वजनिक सूचना जारी करटी कैलारी गाउँपालिकाके गम्भीर ध्यानाकर्षण हुइल जनैले बा ।

यी सन्र्दभमे कैलारी गाउँपालिकामे कार्यक्रम कार्यान्वयन करे चाहल ईच्छुक संघ संस्थाहे नीति विधि अनुरुप गाउँपालिकामे समन्वय कैना अनुरोध कैनाके साथे आम कैलारीवासी किसानहुकनमे यैसिन प्रकृक्तिके कार्यसे सचेत तथा जागरुक रना अनुरोध कैगिल बा ।

आबसे गाउँपालिकाहे विना जानकारी यैसिन क्रियाकलापमे संलग्न हुइल व्यक्ति तथा संघ संस्थाहे नियमानुसारके कारवाही कैना जानकारी करैटी यी सम्बन्धमे कौनो जानकारी प्राप्त हुइलेसे वडा कार्यालय वा गाउँपालिकामे जानकारी करैना सक्कुहुनहे गाउँपालिका अध्यक्ष अपिल करले बटै ।