देशमे परिवर्तन ओ विकास यूवाके हातमेः गापा उपाध्यक्ष
पहुरा समाचारदाता
हसुलिया, ३१ सावन । कैलारी गाउँपालिका वडा नम्बर ८ रुपान्तरण कक्षामे सहभागी किशोरकिशोरीहुक्रे सकारात्मक समाज परिवर्तनमे लागल बटै ।
दिगो विकास समाज भजनी, बालकल्याण संघ टिकापुर ओ वल्र्ड भिजनके संयूक्त साझेदारीमे कैलारी गाउँपालिका वडा नम्बर ८ मे बाल संरक्षण तथा सामुदायिक सहभागिता परियोजना लागु करलपाछे रुपान्तरण कक्षामे सहभागी २५ जाने किशोर किशोरी सिख्ना सिखैना कैटी सकात्मक समाज परिवर्तनके प्रयास करटी रहल बटै । उ किशोर किशोरी प्रत्येक शनिच्चरके जीवन उपयोगी ज्ञान आर्जन कैटी उहीहे समाजके अन्य किशोरकिशोरीमे लागु कैटी बटै ।
रुपान्तरण कक्षाके अनुगमनके क्रममे गाउँपालिका उपाध्यक्ष भगवतीकुमारी चौधरी यूवा देशके कर्णधार रहल कहटी समाज परिवर्तनमे यूवाके भारी हात रना बटैली । उहाँ कहली, ‘अब्बे समाजे नैमजा विकृति फैल्टी बा । युवाहुक्रे पह्राई छोरके नैमजा कुलटमे फस्टे, बालविवाह बह्रल बा, लागु औधष सेवनकर्ता बह्रल बटै । आब जेकर सवाल ओकर नेतृत्व हुइलेसे केल परिवर्तन नाने सेक्जाई । यूवा यूवती विग्रही कलेसे ओइनहे सपारेक लाग यूवा लग्लेसे सपारे सेक्जाई ।’
अपन जीवनके संषर्घ सुनैटी उहाँ बहुट बाधाअवरोधके बाबजुट मास्टरर्ससमके अध्ययन पुरा करल कहटी पह्राईहे कदपी नैछारके निरन्तरता डेना किशोर किशोरीहुकनहे आग्रह करली । कौनो किशोर किशोरीके डाई बाबा अक्कोफे पह्रल नैरहलेसेफे अपन लर्कानके शिक्षाके लाग भुखे रहिकेफे कमैटी आघे बह्राई चाहल ओरसे डाई बाबा, गुरुहे जबसे सम्मान कैना उहाँ बटैली ।
वडा नम्बर ८ के वडा अध्यक्ष तारामल कठरिया अपन दुई कार्यकालके अनुभव सुनैटी २०७४ साल पहिलेसे रुपान्तरण कक्षा संचालन हुइटी आइल बटैलै । उहाँ कहलै, ‘जौन किशोरकिशोरी रुपान्तरण कक्षामे सहभागीता हुइल बा । ओइनके जीवनमे परिवर्तन आइल बा । उ यूवा यूवती समाज परिवर्तनमे समेट टेवा पुगैले बटै ।’
रुपान्तरण साथी शिक्षक अनुराग चौधरी साप्तहिक कक्षा संचालनसे यौन तथा प्रजनन स्वास्थ्य अन्तर्गत यौन तथा प्रजनन अधिकार, महिनावारी, यौन तथा यौनिकता, यौनजन्य सङ्क्रमण ओ एच.आई.भी, परिवार नियोजन, गर्भपतन तथा कम उमेरमे हुइना गर्भावस्या, सुरक्षित मातृत्व सम्बन्धी विषयके ज्ञान सिखैना करल बटैलै ।
किशोरअवस्थामे हुइ सेक्ना लैंगिक हिंसा अन्तर्गत टमान मेरके हिंसा उहीहे न्युनीकरण कैना उपाय, वाल विवाह, घरेलु हिंसा, यौनजन्य हिंसा तथा मानव बेचविखन सम्बन्धी विषय सिखैना करल बटैलै ।
रुपान्तरण साथी शिक्षक नृप बहादुर चौधरी किशोराअवस्थामे कैसिक सरसफाइ कायम कैना, कैसिन खैनचिज पोषणयुक्त रहठ, प्राथमिक उपचार कहल का हो कैसिन समयमे प्राथमिक उपचारके आवश्यकता परठ कना विषय सिखैटी रहल बटैलै । स्थानीय स्तरमे हुइना नीति निर्माण तथा ओकर कार्यान्वयनमे किशोरकिशोरीके सहभागिता, समुदायमे रहल प्राकृतिक स्रोतके पहिचान, ओइनके सदुपयोग, जलवायु परिवर्तन, प्रकोष व्यवस्थापन, बचत तथा खर्च प्रभावकारी रूपमे कैसिन कैसिक कैना, जीविकोपार्जनके विकल्प अन्तर्गत नोकरी, व्यावसायिक तालिम, उद्यम, ग्रामीण दिगो जीविकोपार्जन, योजना ओ बजेट विषय सिख्ना सिखैना करल बटैलै ।
रुपान्तरण कक्षामे सहभागी यूवा सुमत चौधरी समाज डेखा पर्ना विकृतिके विरुद्ध व्यक्तिगत रुपमे, समुह मार्फत ओ सडक नाटक कैटी जनचेतना बह्रैना प्रयास करल बटैलै ।
बाल कल्याण संघके कार्यक्रम अनुगमन तथा मुल्यांकन अधिकृत, हरिप्रसाद जोशी नेपाल सरकारसे किशोरकिशोरीके समग्र विकासके लाग ओइनके अधिकार ओ विकाससँग सम्बन्धित सवालहे अपन नीति, योजना तथा कार्यक्रममे एकीकृत रुपमे समायोजन करटी विकास प्रक्रियाके मूलप्रवाहमे समाहित कैना पहल करल बटैलै ।
रुपान्तरण तथा जीवन उपयोगी सीप पाठ्यक्रम एवं साक्षर किशोर–किशोरीहे ओइनके समय विकासममे सहयोग कैना उद्देश्य धारके तयार करल उहाँ जनैलै ।
बाल कल्याण संघके फिल्ड अधिकृत परशु चौधरी वल्र्ड भिजन इन्टरनेसनल नेपालके साझेदारीमे बाल कल्याण संघ टीकापुरसे सन २०२१ से कैलालीके टीकापुर नगरपालिका, भजनी नगरपालिका, घोडाघोडी नगरपालिका, गौरीगंगा नगरपालिका ओ कैलारी गाउँपालिकामे रुपान्तरण तथा जीवन उपयोगी सीप तथा आत्मरक्षा सीप सम्बन्धी तालिम संचालन करटी आइल बटैलै ।
कार्यक्षेत्रमे रहल वडा कार्यालयसंग पैरवी तथा साझेदारी करटी स्थानीय तहहे रुपान्तरण कक्षा संचालन कैना स्रोत तथा वजेट विनियोजन करेक लाग पहल करटी आइल ओ स्थानीय तहफे अपने स्रोतसे कतिपय ठाउँमे अपनही रुपान्तरण कक्षा संचालन करटी आइल उहाँ बटैलै ।
रुपान्तरण कक्षामे १० से १४ बरस ओ १५ से १९ बरस समुहके सहभागीहुक्रे स्थानीय वडाके छनौटमे सहभागी हुइना करठै ।
