दलीय दासता नइस्वीकर्ना

पहुरा समाचारदाता
टीकापुर, ८ भदौ । कैलालीके टीकापुरमे थारुहुक्रे ‘नवौं टीकापुर विद्रोह दिवस’ शुकके रोज मनैले बटै ।

दिवसमे संघीय सरकारके संस्कृति, पर्यटन तथा नागरिक उद्ययन राज्य मन्त्री अरुण चौधरीसहित जिल्लाभरके थारु अगुवा नेताहुकनके उपस्थिति रहल रहे । जहाँ सक्कु जानेक एक्के स्वर रहे ‘आन्दोलनके विकल्प नैहो, दलिय दासता स्वीकार्य नैहुई ।

गैल वर्ष विद्रोह दिवसके आठौं बर्षगाँठमे एक्के मञ्च प्रयोग करलेसेफे नेताहुकनमे ठोरिक अनमन विल्गाइल रहे । मने यी फेरा भर विवादरहिट ढंगसे एक्के मञ्च सहज स्वीकारल ओ मञ्चसे बोलल विल्गाइल ।

कार्यक्रममे थारुहुक्रे थरुहट प्रदेश पाई परठ कना आवाज उठाइल कारण जेल जीवन विटाइल सक्कु थरुहटवादीहुकनहे बरका पहुना, वर्तमान मन्त्री, भू.पू. मन्त्री, जनप्रतिनीधिहुकनहे विशिष्ट पहुना ओ और जाहनहे पहुना बनाइल रहे ।

नाउपाके संरक्षक एवं पूर्व सांसद रेशम चौधरी लाल आयोग गठन के करल, काहे करल ओ काह् ओकर प्रतिवेदन सार्वजनिक नैकरल ? कहटी राज्यहे प्रश्न करलै ‘का हम्रे पहिचानके मुद्दा उठैना गलत रहे ? अधिकार मग्ना गलत रहे ? हम्रे हमार संस्कृति बचादेऊ कहेबेर हमार गल्ती का ? हम्रे निर्दोष रहरहटीफे जेल कोच्ना थारु हुइल कारण हो ?’ उहाँ अपन फूलवारी एफएम, रिसोर्टमे आगी लगाइल सम्झटी कहलै, मोर वहाँ रहल सारा सम्पत्ति जरागिल । मने, सबसे दुःखके बाट मोर वहाँ रहल छालाके पुस्तक, लिपि जरल । महीसे औरजे सामान लैजैटी रहल फुटेज बा । मने, मै यिहे ठाउँमे बैठना बा, समाज मिलाके लैजैना बा, उ जिम्मेवारी फे मोर हो ।

रेशमसे रामजनम चौधरीहे सभामे करल बाचा नबिस्रैना अनुरोध करटी कहलै, ‘रामजनम डाडु, आब हुइना थारु ओ थरुहटके लाग हुइना आन्दोलनमे हम्रे नैछोरब । भग्बी कलेसे घरसे गोर पकर घिस्याके ल्यान्बी ।’ उहाँ टीकापुरमे फेर प्लेन उरना ठोकुवा करटी कहलै, “अब टीकापुर दुसर जिल्ला एक बनी, दुई बनी, तीन बनी ।”

थरुहट आन्दोलनके उठानकर्ता लक्ष्मण थारु अपने कोहलपुरमे रहेबेर टीकापुरमे घटना घटल ओ राज्यसे जेल डारल स्मरण करैटी उहाँ कहलै “कोई भ्रममे नैबेठलेसे हुइठ । हम्रे भग्ना वाला नैहुई, अधिकारके लाग हम्रे यिहे लरबी, यिहे मुबी, यिहे बाच्बी ।” जेल परेबेर काँग्रेस, एमालेके कतिपय व्यक्ति अपनेहुकनहे हत्यारा कहलमे दुःख लागल बटैटी उहाँ उ बेलाके डिएसपी विश्वराज खड्का अखण्ड पक्षधरहुकनहे थारुहुकनके घरमे ढुङगा मारे लगाइल बटैलै । दलीय ह्वीप नैमन्ना विचार व्यक्त करल संघरियनहे सूचेत करटी उहाँ आघे कहलै, संघरिया विचार करी, कुवाँर ३ गते हम्रे संविधानके कुछ धारा जरैबी ।

संस्कृति, पर्यटन तथा नागरिक उद्ययन राज्यमन्त्री अरुणकुमार चौधरी अपन उमेर कम हुके फे थरुहट आन्दोलनके शुरुवाटसे अपने लागल, आन्दोलनमे लागबेर अपन ट्रयाक्टरसमेत जरल बटैले रहिट । उहाँ अब्बेफे थारुहुकनके लाग करे सेक्ना काम कैना धारणा राखल रहिट ।

नाउपाके सांसद गंगाराम चौधरी अपने संसदमे टिआरसीमार्फत् थारुहुकन उप्पर लगाइल झुठठा मुद्दा खारेज करे पर्ना आवाज उठाइल जानकारी करैले रहिट कलेसे पूर्वमन्त्री रामजनम चौधरी थारुहुकनके अधिकारके लाग दलीय ह्वीप नैमन्ना ओ जबसम थारुहुकनके माग, मुद्दा सुनुवाई नैहुई, तबसम लरटी रना, संविधान संशोधनसे प्रदेश मिली कलेसे ओम्नेफे ध्यान डेहे पर्ना बटैलै ।
संविधान सभा सदस्य कृष्णकुमार चौधरी (कुन्दन) थरुहट प्रदेशके लडाई निरन्तर जारी रहना आशय व्यक्त करटी जनसंख्याके आधारमे राज्यमे थारुहुकनके सुनिश्चितता अनिवार्य हुसेकल बटैलै । उहाँ यदि देशमे १०० जाने आर्मीके भर्ती खुल्ठ कलेसे ७ जाने थारुहुकनके सिट अनिवार्य हुई पर्ना बटैलै । उहाँ थारुहुक्रे मागल जम्माजम्मी थरुहट प्रदेश, समान अनुपातमे सहभागिता ओ भाषा संस्कृतिके संरक्षण रहे कना विचार व्यक्त करले रहिट ।

नेकपा एमालेके जिल्ला सचिव ममताप्रसाद चौधरी थरुहट आन्दोलनहे कतिपय व्यक्ति अन्डरस्टीमेट, अनदेखा करटी रह कहिके रोष प्रकट करटी प्रदेशके सवालमे गहन छलफल ओ संविधान संशोधनमे ढेर ध्यान डेके आघे बह्रे पर्ना विचार व्यक्त करलै ।

नेकपा माओवादीके जिल्ला अध्यक्ष लाजुराम चौधरी अंकित २०६४ सालमे पार्टीके नीति ओ व्यवहार मन नैपरलपाछे लक्ष्मण थारुसहित अपनेहुक्रे पार्टीसे विद्रोह करल स्मरण करैटी थारुहुकनके लाग कारवाही समेतके परवाह नैकरल स्मरण करैले रहिट । उहाँ आबके दिन प्रहरी, प्रशासन, सेनामे थारुके प्रतिशत कटरा ? उ खोज्ना दिन आइल बटैलै ।

नेपाल रानाथारु समाजके केन्द्रीय सदस्य कमल राना वर्तमान सरकारके संविधान संशोधनसे थारुहुकनके हक अधिकार सम्पन्न हुइना बाटमे विश्वास नैकरल ओ सुदूरपश्चिम सरकारो ९ सदस्यीय समितिसे थारुहुकनके आरक्षणके मागहे सम्बोधन करी कना बाटमे विश्वस्त हुई नैसेकल विचार व्यक्त करले रहिट ।

कार्यक्रममे सांसद लालबीर चौधरी, नेपाली काँग्रेस कैलालीके उपसभापति खेमराज चौधरी, आदिवासी जनजाति महासंघके प्रदेश अध्यक्ष दल बहादुर घर्तीमगर, थरुहट थारुवान राष्ट्रिय मोर्चाके प्रेमवती राना, जेलजीवन काटसेकल रामप्रसाद चौधरी, लगायत मन्तव्य व्यक्त करल रहिट ।

थारु कल्याणकारिणी सभा कैलालीके सभापति विरबहादुर थारुके अध्यक्षतामे हुइल कार्यक्रममे थरुहट थारुवान राष्ट्रिय मोर्चा कैलालीके संयोजक माधव थारुके स्वागत मन्तव्य व्यक्त करल रहिट ।

कार्यक्रममे नृत्यफे प्रस्तुत करल रहे । लोकगायक मनिराम चौधरी, गायिका सोमती चौधरीले गीतमार्फत् आउर अन्तिम लडाई बाँकी रहल, केक्रो आघे नैझुकबं हम्रे, थरुहट राज्य नैछोरब कना सन्देश डेहल रहे ।

कार्यक्रमके आयोजना थरुहट थारुवान राष्ट्रिय मोर्चा, थारु कल्याणकारिणी सभा जिल्ला कार्यसमिति कैलाली ओ थारु विद्यार्थी समाज करल रहे ।