आचार्य दमाईहे सम्मान
पहुरा समाचारदाता
धनगढी, ८ भदौ । धनगढी उपमहानगरपालिकासे आचार्य कृष्णबहादुर दमाईहे सम्मान करले बा । शनिच्चरके एक कार्यक्रमके आयोजना कैके उपमहानगरसे आचार्य दमाईहे सम्मान करल हो ।
धनगढी उपमहानगरपालिकाके नगर प्रमुख गोपाल हमाल आचार्य दमाईहे सम्मान पत्र ओ एक लाख ५१ हजार नगदसहित सम्मान करल हुइट ।
आचार्य दमाईहे बाजागाजासहित नगर सभा हलमे नगर प्रमुख हमाल, कार्यपालिका सदस्य ओ कर्मचारीहुक्रे स्वागत समेत करल रहिट ।
इहे बिच आर्थिक अभाव खेप्टी रहल दमाइहे धनगढी उपमहानगरपालिकासे जागीर डेना जनैले बा । नगर प्रमुख हमाल दमाइ जागीर पैलेसे जीवनयापन कैना सहज हुइना बटैटी काम डेना बटाइल हुइट । नगर प्रमुख हमाल शिल्पी समुदायसे आचार्य उपाधी हासिल करल दमाइहे आर्थिक समस्या हुइल पटापाके सम्मानसहित नगद सहयोग करल बटैलै ।
उहाँ आचार्य दमाई चाहल बेला धनगढी उपमहानगरपालिकामे जागीर करे अइना आग्रह करले बाटै । कञ्चनपुरके भीमदत्त नगरपालिका–३ घर रहल दमाइ नेपाल संस्कृत विश्व विद्यालयसे संस्कृत साहित्यमे आचार्य करल हुइट । शिल्पी समुदायसे संस्कृतमे आचार्य पास करुइया दमाई नेपालके पहिल व्यक्ति हुइट ।
सम्मान कार्यक्रममे बोल्टी आचार्य दमाइ सनातन धर्मके रक्षाके लाग सककु समुदायसे विभेद त्यागके आघे बह्रे पर्ना बटैलै । उहाँ धनगढी उपमहानगरपालिका स्थानीय तहमध्ये सबसे पहिले आपनहे सम्मान करलमे खुशी व्यक्त कैटी सनातन धर्मके रक्षाके लाग काम कैना बटैलै ।
