कैलारी–५ ओ ३ के बाढ पीडिहुकनहे राहात वितरण

पहुरा समाचारदाता
धनगढी, ९ भदौ । कैलाली जिल्लाके कैलारी गाउँपालिका वडा नम्बर ३ ओ ५ के बाढ पीडितहुकनके राहात वितरण कैगिल बा ।

सेभ द चिल्ड्रेनके आर्थिक सहयोग, एमपिडिएसके प्राविधिक सहयोग ओ कैलारी गाउँपालिकाके समन्वयमे दुई वडाके २ सय १९ बाढ पीडितहुकनहे पानी किट, स्वच्छता किट,भान्साके भाडा, डिग्निटी किटके सामान वितरण कैगिल बा ।
कैलारी गाउँपालिका अबसिक बाढसे सबसे ढेर पीडित हुइल कहटी पालिकाके अनुरोधमे पीडितहुकनके राहात सामाग्री वितरण कैगिल सेभ द चिल्ड्रेनके परियोजना संयोजक फुलकुमारी चौधरी बटैली ।

राहात वडा नम्बर ५ के वडा अध्यक्ष विष्णु प्रसाद चौधरी, वडा नम्बर ४ के वडा अध्यक्ष तथा विपद व्यवस्थापन समिति संयोजक ठागुराम चौधरी, वडा नम्बर ३ वडा अध्यक्ष तथा सामाजिक विकास समिति संयोजक सन्तराम चौधरी, कार्यपालिका सदस्य मनिराम कुमाल, वडा सदस्य अनारकली चौधरी, मानबहादुर चौधरी, भागुदास चौधरी, नेपाल रेडक्रस सोसाइटी कैलारी गाउँपालिका उप–शाखाके उपाध्यक्ष मीना चौधरी, नागरिक उन्मुक्ती पार्टी कैलारी गाउँपालिका अध्यक्षके उम्मेदवार भीष्म चौधरी, सेभ द चिल्ड्रेनके परियोजना संयोजक फुलकुमारी चौधरी, एमपिडिएसके डिआरआर टेक्निकल एक्सपर्ट राजेन्द्र रैकालगायतसे राहात सामाग्री हस्तान्तरण करल रहिट ।

राहात सामाग्री हस्तान्तरण कार्यहे सहज बनाइक लाग नेपाल तरुण कैलारी गाउँपालिकाके अध्यक्ष केदार चौधरीलगायत तरुण दलके टिम सहयोग करल रहे । गैल भदौ ५ ओ ६ गतेक बाढसे कैलारी गाउँपालिकाके वडा नम्बर १ से ८ सम ५ सय ४७ घरधुरी प्रभावित हुईबेर १७४ घरघुरी विस्थापित हुइल रहिट ।