कैलारी ‘के गाउँ’ मे पुरुष ओ महिला फुटवल प्रतियोगिता सुरु

पहुरा समाचारदाता
हसुलिया, १४ भदौ । कैलाली जिल्लाके कैलारी गाउँपालिका वडा नम्बर ४ स्थित के गाउँके खेल मैदानमे शुकके रोजसे पुरुष ओ महिला फुटवल प्रतियोगिता सुरु हुइल बा ।

थारु समुदायमे अँटवारी टिहुवार ओ नेपाली महिलाहुकनके महान पर्व हरितालिका तिजके अवसरमे न्यू युवा सुन्दर शक्ति क्लवके आयोजनामे फुटवल प्रतियोगिता सुरु हुइल हो । फुटवल प्रतियोगिताके उदघाटन सुदूरपश्चिम प्रदेश सरकारके सामाजिक विकास मन्त्री माननीय मेघराज खडका करल रहिट । कलेसे प्रतियोगिता उदघाटन कार्यक्रमके विशिष्ट पहुना कैलारी गाउँपालिका अध्यक्ष राजसमझ चौधरी, गाउँपालिका उपाध्यक्ष भगवतीकुमारी चौधरी ओ प्रतियोगिताके मुख्य प्रवद्र्धक रहल निसर्ग अस्पताल प्रालिके अध्यक्ष तिर्थराज पन्त रहल रहिट ।

प्रतियोगिताके उदघाटन कार्यक्रममे सम्बोधन करटी माननीय मन्त्री खडका गाउँठाउँमे आयोजना हुइना यी मेरिक प्रतियोगितासे गाउँघरमे नुकल प्रतिभाके उजागर हुइना बटैलै । उहाँ कहलै, ‘प्रतियोगितासे गाउँघर हुइटी जिल्ला, प्रदेश, राष्ट्रिय अन्तर्राष्ट्रियस्तरमे अवसर पाके अपन प्रतिभा डेखाई सेक्ठै । सुदूरपश्चिमके भैया बहिनीय चाहे क्रिकेट, फुटवल ओ भलिवल लगायतके क्षेत्रमे आघे बटै ।’

नेपाल खेलकुदके क्षेत्रमे भारी सम्भावना बोक्ले बा । लगानी कम बा । यी क्षेत्रमे जटरा करे पर्ना हो । निजि क्षेत्र होए वा सरकारी क्षेत्रसे । प्रतियोगिता निरन्तरताके कामनाफे करलै । ओस्टेक स्वर्गिय रामसमझ चौधरीके योगदानबारे चर्चा करटी नेपाली लोकतन्त्रमे उहाँके भारी योगदान करल मन्त्री खडका बटैलै ।

न्यू युवा सुन्दर शक्ति क्लवके खेलमैदानहे स्वर्गीय रामसमझ चौधरीके नाउँसे स्टुडियम बनाइक लाग कुछ कुछ सुरुवाट कैना ओर पहल रनाफे मन्त्री बटैलै ।

कार्यक्रमके विशिष्ट पहुना रहल कैलारी गाउँपालिका अध्यक्ष राजसमझ चौधरी घरेलु टिमहे अवसर प्रदान करेक लाग प्रतियोगिता आयोजना हुइना मजा बाट रहल कहटी गाउँपालिकासे शिक्षा, स्वास्थ्य, कृषिसंगे खेलकुदओर बजेट विनियोजन करटी आइल बटैलै ।

उहाँ कहलै, ‘कैलारी गाउँपालिकाके खेलाडी अब्वल खेलाडीके रुपमे स्थापित हुइटी गैल मने यहाँ खेलमैदानके अभाव रहल बा । खेलकुद प्रतियोगिता तथा खेलकुद सामाग्रीके लाग पालिका प्रत्येक बरस बजेट विनियोजन करटी आइल बा । भारी प्रतियोगिताके लाग सामाजिक विकास मन्त्रालयसेफे छलफल हुइल बा ।

कार्यक्रमके दुसर विशिष्ट पहुना गाउँपालिका उपाध्यक्ष भगवतीकुमारी चौधरी खेलाडी देशके गहना रहल बटैली । उहाँ कहली, ‘खेलकुदसे अनुशासित बनाइठ । देशके विकासमे टेवा पुगाठ । अब्बे यूवा लागु औषधके कुलटमे फस्टी गैल बटै । यूवाहे खेलकुदमे व्यस्ता बनाइ सेक्लेसे देशके विकास, शारिरीक विकासफे हुइठ । उहीहे लागु औषध दुव्र्यशनीफे नियन्त्रण करे सेक्जाई ।’

कार्यक्रममे कैलारी गाउँपालिका वडा नम्बर ४ के वडा अध्यक्ष ठागुराम चौधरी, वडा नम्बर ७ के वडा अध्यक्ष दिपेन्द्रबहादुर बम, नेपाली काँग्रेस कैलाली जिल्ला सचिव नृपबहादुुर सुनार, निसर्ग अस्पताल प्रालिके अध्यक्ष तिर्थराज पन्त लगायत मन्तव्य व्यक्त करल रहिट ।

आयोजक क्लवके अध्यक्ष बृक्षलाल चौधरीके अध्यक्षतामे हुइल कार्यक्रममे स्वागत मन्तव्य कैलारी गाउँपालिकाके कार्यपालिका सदस्य लालबहादुर विक व्यक्त करल रहिट । कार्यक्रममे कैलारी गाउँपालिका वडा नम्बर ३ वडा अध्यक्ष सन्तराम चौधरी, वडा नम्बर ५ क वडा अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेमबहादुर चौधरी, वडा सदस्य, टमान राजनितिक दलके प्रतिनिधिलगायत टमान खेलकुद समितिके प्रतिनिधिहुकनके सहभागिता रहे । कार्यक्रमके संचालन टेकेन्द्र परियार करल रहिट ।

भदौ २२ गतेसम हुइना प्रतियोगितामे १३ ठो पुरुष टिम ओ आठ ठो महिला फुटवल टिम भाग लेले बटै । जेम्ने पुरुष ओर पहिल हुइना टिमहे ९९ हजार ९ सय ९९ रुप्या, दुसराहे ४९ हजार ९ सय ९९ रुप्या पुरस्कारके व्यवस्था करल बा । कलेसे महिला फुटवल ओर पहिल पुरस्कार २५ हजार, दुसरा पुरस्कार १५ हजार व्यवस्था करल क्लवके अध्यक्ष वृक्षलाल चौधरी बटैलै ।