चैतन्य तीज उत्सव तथा आमा तीज नृत्य प्रतियोगिता
पहुरा समाचारदाता
धनगढी, १४ भदौ । धनगढीमे रहल चैतन्य पाठशालासे नेपाली महिलाहुकनके महान् चाड हरितालिका तीज अवसरमे चैतन्य तीज उत्सव तथा आमा तीज नृत्य प्रतियोगिता २०८१ तीज विशेष कार्यक्रम कैगिल बा ।
तीजके अवसरमे चैतन्य पाठशालासे आयोजित तीज उत्सव कार्यक्रममे आमा तिज समूहके विशेष प्रस्तुती रहल रहे । आमा तीज नृत्य प्रतियोगितामे पहिल स्थान सपना पैडेल, दुसरा स्थान झरना विष्ट ओ टिसरा स्थान कल्पना साउद करल रहिट । कलेसे रुपाली थापा, सम्बृद्धी बोगटी ,सुनिता साउद, चाया खत्री, बेदना रावल लक्ष्मी गिरीलगायत सन्त्वाना पुरस्कार पैले रहिट ।
ओइने तिजके टमान धुनमे गीत तथा नृत्यसहितके प्रस्तुती डेखाइल रहिट ।
कार्यक्रम चैतन्य पाठशालाके अध्यक्ष ईश्वर गिरीके अध्यक्षतामे हुइल रहे । धनगढी उपमहानगरपालिकाके नगर उपप्रमुख कन्दकला रानाके बरका पहुनामे हुइल कार्यक्रममे महिलाहुकनके महान चाड हरितालिका तीज कार्यक्रमसे महिला शसक्तिकरणके सन्देश डेहल बटैली । अभिनफे महिलाहुकनहे जटरा हकअधिकार पाईपर्ना रहे उ नैपाइल बटैली । उहाँ अपनओरसे करे सेक्ना सहयोगके कमी नैरख्ना बटैली ।
कार्यक्रममे पाठशालाके प्रधानाध्यापक कटकबहादुर सिंह कला, सस्कृति जोगैना हम्रे सक्कु जानेक दायित्व रहल बटैलै । चैतन्य पाठशाला सदैव हरेक समुदायके टरटिहुवारके अवसरमे कार्यक्रमके आयोजना करटी शिक्षासंगे संस्कारमे विशेष ध्यान डेहल प्रधानाध्यापक सिंह बटैलै ।
प्रतिस्पर्धात्मक नत्य तथा गीतके निर्णायक समितिसे मूल्यांंकन करल रहिट । कार्यक्रममे चैतन्य तीज उत्सव तथा आमा तीज नृत्य प्रतियोगिता २०८१ तीज विशेष कार्यक्रमके पहिल हुइलहे ५ हजार दुसराहे ३ हजार ओ टिसराहे २ हजार नगद पुरस्कार प्रदान करल रहे । हरेक बर्ष तिजके उपलक्ष्यमे पाठशालासे आयोजना कैना कार्यक्रममे नृत्य तथा दर कार्यक्रम करटी आइल बा ।
