दर्शन वेकरी क्याफेसे सुदूरपश्चिमके मौलिक खानाके सुविधा डेना
पहुरा समाचारदाता
धनगढी, १५ भदौ । कैलाली जिल्लाके धनगढी उपमहानगरपालिका वडा नम्बर ८ शिवनगरमे संचालनमे आइल दर्शन वेकरी एण्ड क्याफेसे वेकरीके सक्कु परिकारके साथे सुदूरपश्चिमके मौलिक खानाके सुविधा डेना जनैले बा ।
शनिच्चरके रोज उ क्याफेके विधिवत उदघाटनके क्रममे संचालक सुनिता खडका ॅदर्शन वेकरी एण्ड क्याफे’ मे वेकरीके सक्कु परिकारके साथे सुदूरपश्चिमके मौलिक खानाके सुविधा डेटी रहल जनैली ।
सिटीइभिटीसे होटल मेनेजमेन्ट कैके फोर स्टार, थ्रीस्टरलगायत टमान होटलमे एक दशक अनुभव पश्चात उहाँ धनगढीके शिवनगर पुल आघे अपने व्यवसाय संचालन करल जनैली ।
दर्शन वेकरी एण्ड क्याफसे हाईजिनिक खानाके व्यवस्था कैटी रहल उहाँ बटैली । उहाँ कहली, ॅअपने देशमे सिखल सीप ओ छोट लगानी हुइलेसेफे स्वदेशमे कुछ रोजगारी व्यवसाय कैना जरुरी बा । यहाँके यूवा पढ लिखके थोरचे पैसाके लोभ लालचमे विदेश कमाई जैठै । मने स्वदेशमे कुछ व्यवसाय संचालन करके ढेर सम्भावानाफे बा । आम्दानीके स्रोत बह्राई सेक्जाई ।’
सुदूरपश्चिमके मौलिका खाना लोप हुइटी रहल ओरसे अपनेहुक्रे वेकरीके साथे यहाँके खानाहे प्राथमिकता डेहे खोजल संचालक सुनिता बटैली । ढेर यूवा रोजगारी नैपाके खाली बैठल बटै । अपने ठाउँ शहरमे व्यवसाय संचालन करलेसे और जनहनफे रोजगारी डेहे सेक्ना उहाँ बटैली ।
