कैलारीके वडा नम्बर ५ ओ ७ फेरी डुबानमे

पहुरा समाचारदाता
हसुलिया, २८ भदौ । कैलाली जिल्लाके कैलारी गाउँपालिका वडा नम्बर ५ ओ ७ फेरसे डुबानमे परल बा ।

बुधके रातसे बरस अविरल बर्षाके कारण कैलारी–५ स्थित पुरान मन्कापुर, बैजपुर ओ वडा नम्बर ७ स्थित छटकपुर बसन्ता, बरका बसन्ता, भुइयाँफाटा, रामपुरलगायत गाउँ बाढसे प्रभावित हुइल इलाका प्रहरी कार्यालयके प्रमुख लोकेन्द्रबहादुर चन्द जनैलै ।

कैलारी वडा नम्बर ५ पुरान मन्कापुरके १६ घरमे पानी पैठल उहाँ जनैलै । ओस्टेक वडा नम्बर ७ स्थित बसन्ताके राष्ट्रिय आधारभूत विद्यालयमे बाढ पेलके पठनपाठन अवरुद्ध हुइल बा । फुटल धानवाली ओ पाकल धान डुबानमे परल बा । कलेसे हावा बयारसे धानवाली सुटाके नोक्सान बनैले बा ।

ओस्टेक जल तथा मौसम विज्ञान विभागसे डेहल जानकारी अनुसार पछिल्का ६ घण्टामे कैलालीके ढेर स्थानमे भारी बर्षा हुइल ओ थप हुइना डेखल ओरसे मोहना, खुटिया, कान्द्रा, घुराहा, कटैनी, पथरिया लडियाके जलसतह बह्रटी रहल बा । बाढ सतर्कता खतरा आसपास डेखल ओरसे तटीय क्षेत्र ओ डुवान हुइना खाल्ह ठाउँमे साँझ सम उच्च सतर्कता अपनैना आग्रह करल बा ।