जिल्ला स्तरीय समन्वय तथा सल्लाहकार समितिके बैठक निम्जल

पहुरा समाचारदाता
धनगढी, ३० भदौ । प्राकृतिक स्रोत द्वन्द रुपान्तरण केन्द्र नेपालसे कैलाली जिल्लामे ंसंचालन करल कार्यक्रमके समिक्षा तथा सुझाव संकलनके लाग अँटवारके रोज धनगढीमे जिल्ला स्तरीय समन्वय तथा सल्लाहकार समितिके बैठक निम्जल बा ।

जिल्ला समन्वय समिति कैलालीके कार्यवाहक सभापति खगराज भुषालके अध्यक्षतामे हुइल कार्यक्रममे कैलाली जिल्ला प्रशासन कार्यालय कैलालीके प्रमुख जिल्ला अधिकारी धर्मेन्द्र मिश्र विशिष्ट पहुना रहल रहिट । कार्यक्रममे उहाँ प्राकृतिक स्रोत द्वन्द रुपान्तरण केन्द्र नेपालसे जल, जंगल ओ जमिनके बहुसरोकारके विवाद समाधनके लाग मजा कार्य करल बटैलै । उहाँ कहलै, ‘जल, जंगल ओ जमिनके जेहोेर टेहोर ढेर विवाद बा ।

उ विवाद बह्रटी गैलेसे अपराधिक घटनामे परिणत हुइठ । स्थानीय तहमे गठन हुइल न्यायिक समितिसे विवाद हेर्ना करठ । उहीहे समन्वय करके गैलेसे शान्ति स्थापना करे सेक्जाई ।’

घोडाघोडी नगरपालिकाके नगर उपप्रमुख गुलियाकुमारी चौधरी ढेर बरसके विवाद समाधनके लाग प्राकृतिक स्रोत द्वन्द रुपान्तरण केन्द्र नेपालसे समन्वय करके जैटी रहल बटैली ।

कार्यक्रममे बार एशोसियशन कैलालीके अध्यक्ष इन्द्र प्रसाद लेखक, सव डिभिजन वन कार्यालयके गोपीकृष्ण जोशीलगायतसे सुझाव तथा शुभकामना व्यक्त करल रहिट ।

कार्यक्रममे संस्थाके गतिविधिबारे संस्थाके पश्चिम संयोजक बल्लु चौधरी जानकारी डेहल रहिट । ओस्टेक कैलाली जिल्लासे कैगिल गतिविधिबारे संस्थाके कैलाली जिल्ला संयोजक गंगा दुलाल जानकारी डेहल रहिट । कार्यक्रमके संचालन संस्थाके सहजकर्ता बन्धुविवस चौधरी करल रहिट । बैठकमे टमान स्थानीय तहके उपपमुख, सरोकारवाला सरकारी कार्यालयके प्रमुख तथा प्रतिनिधिहुकनके सहभागिता रहे ।