लैङिक समावेशी जरुरी बाः मन्त्री खडका
पहुरा समाचारदाता
धनगढी, ३० भदौ । सुदूरपश्चिम प्रदेश सरकारके सामाजिक विकास मन्त्री मेघराज खडका हरेक क्षेत्रमे लैंगिक समावेशी जरुरी रहल बटैले बटै ।
मानव अधिकारका लागि महिला एकल महिला समुह केन्द्रीय कार्यालयके आयोजनामे अँटवारके रोज धनगढीमे हुइल बेइजिङ प्लस ३० मे नागरिक समाजके ओरसे प्रतिवेदन तयार कैना प्रदेशस्तरीय पुस्ता समानता परामर्श कार्यक्रममे उहाँ उ बाट बत्वाइल रहिट ।
बेजिङमे हुइल महिला सम्मेलनसे ढेर सुचाकमे काम करले बा,’ मन्त्री खडका कहलै, ‘मनेफे उहीहे अभिन पहुँच, महिलाके स्वामित्व नैहो । लैंगिक सहभागितामे विस्तारे सुधार हुइटी रहल बा । लैङिक समावेशीओर प्रदेश सरकारसे लैङिक समानता ओ अपाङता नीतिके विषयगत छलफल करके क्याविनेटमेफ लैगिल बा ।’
तालिम गोष्ठीमे उठैना मुद्दा लैङिक समानता, अपाङता, लागुऔषध सम्बन्धी जनचेतना मुलक, समावेशिकरणके लाग बजेट तथा कार्यक्रम समुदायस्तरसे आइल माग अनुसार आघे बह्रना जरुरी रहल मन्त्री बटैलै ।
प्रदेश सरकार बजेट शुन्यताके अवस्थामे रहल ओरसे कौनोफे काम करे नैसेकल मन्त्री खडका बटैलै ।
मानव अधिकारका लागि महिला एकल महिला समुहके केन्द्रीय अध्यक्ष कविता पाणेके अध्यक्षतामे हुइल कार्यक्रममे सुदूरपश्चिम प्रदेशसभा सदस्य, महिला अधिकारके क्षेत्रमे काम कैना महिला, टमान संघ सस्थाके प्रतिनिधिहुकनके सहभागिता रहे ।
कार्यक्रममे डब्लु एचआरके संस्थापक अध्यक्ष माननीय डा. लिलि थापा बेइजिङ घोषणापत्र ओ कार्ययोजना प्रस्तुतीकरण करल रहिट । कार्यक्रममे उहे घोषणापत्रमे उल्लेखित हुइल महिलाके स्थितिबारे प्रदेश स्तरीय कार्यशालासे ६ ठो समुह बनाके छलफल करटी सुझाव डेहल बा ।
