धनगढीके थप १० किलोमिटर सडकमे स्मार्ट लाइट बरल

पहुरा समाचारदाता
धनगढी, ३१ भदौ । धनगढीमे थप १० किलोमिटर सडकमे स्मार्ट लाइट जडान कैगिल बा ।
धनगढीके मुख्य सडक ओ सहिद गेट क्याम्पस चोक सडकमे स्मार्ट सडक बत्तीके अँटवारके रोज उदघाटन कैगिल बा । स्मार्ट लाइट सुदूरपश्चिम प्रदेश सरकारके सामाजिक विकास मन्त्री मेघराज खड्का उदघाटन करल हुइट ।

सहरी विकाससे निर्माण करल सक्कु सडकमे सडक बत्ती जडान करल हो । यी बार ५५३ पोलमे स्मार्ट सडक बत्ती ओ १५ ठो हाइमास्ट लाइटके मन्त्री खड्कास स्वीच डाबके उदघाटन करल रहिट ।

स्मार्ट बत्तीके उदघाटनके कार्यक्रममे बोल्टी सामाजिक विकास मन्त्री खड्का धनगढी उपमहानगरपालिकासे मजा काम करटी रहल बटैलै । उहाँ स्थानीय सरकारसे जनताके काम करे सेक्लेसे मजा प्रभाव पर्ना ओ प्रदेश सरकारसेफे जनमुखी काम कैना उपमहानगरपालिकासँग मिलके काम कैना बटैलै ।

‘धनगढीमे सह्रानीय काम हुइल बा । नगर प्रमुख इनोभेटिभ काम करटी आइल बटै,’ उहाँ कहलै ‘नयाँ काम कैना नगर प्रमुख हमालके स्वभावके कारण धनगढीमे मजा काम हुइटी गैल ओ प्रदेश सरकारसेफे टमान काममे सहकार्य करटी आइल बा, अभिनफे करी ।’

कार्यक्रममे नगर प्रमुख गोपाल हमाल, उप–प्रमुख कन्दकलाकुमारी राना, वडा अध्यक्ष, कार्यपालिका सदस्य, कर्मचारी ओ सर्वसाधारणके उपस्थिति रहे ।

संघीय सहरी विकास आयोजनासे सडक बत्ती जडान करल हो । कार्यक्रममे नगर उप–प्रमुख कन्दकलाकुमारी रानासे धनगढीहे ओजरार पर्ना काममे उपमहानगरसे काम करटी रहल बटैली । उहाँ सक्कु वडामे ओजरार कार्यक्रम पुगैना उपमहानगरसे अइना दिनमे समेत काम कैना बटैली ।

यी आघे धनगढी उपमहानगरपालिकाके ६ लेन सडक ओ क्याम्पस चोक (मनेहरा सडक खण्डके जनआवाज चोकसम स्मार्ट सडक बत्ती बारल बा । अब्बे सहरी विकास आयोजनासे निर्माण करल सडकमे स्मार्ट सडक बत्ती जडान करल हो ।