कैलारीके स्वास्थ्य कार्यक्रमके समिक्षा

पहुरा समाचारदाता
हसुलिया, ३१ भदौ । कैलारी गाउँपालिकाके आर्थिक वर्ष २०८०÷०८१ सालमे स्वास्थ्य शाखा अन्र्तगत सम्पन्न कार्यक्रमके वार्षिक समिक्षा तथा योजना तर्जुमा कार्यक्रम सम्पन्न हुइल बा ।

गाउँपालिका अध्यक्ष राजसमझ चौधरी ओ गाउँपालिका उपाध्यक्ष भगवतीकुमारी चौधरीके विशिष्ट आतिथ्यतामे स्वास्थ्य शाखा अन्र्तगतके कार्यक्रमके समिक्षा कैगिल हो ।

अँटवार ओ सोम्मारके रोज हुइल समिक्षा कार्यक्रममे अँटवारके रोज गाउँपालिका अन्र्तगत रहल वडा नम्बर १ से ९ समके स्वास्थ्य संस्थासे प्रगती विवरण प्रस्तुतीकरण कैगिल कैलारी गाउँपालिका स्वास्थ्य शाखा प्रमुख नरेशकुमार चौधरी बटैलै ।

सोम्मारके रोज गाउँपालिकाके प्रस्तुतीकरण कैटी स्वास्थ्य क्षेत्र सेवा प्रवाहमे मजा प्रगती डेखल स्वास्थ्य शाखा प्रमुख नरेशकुमार चौधरी करल रहिट । उहाँ कहलै, ‘पालिकाके एक से नौ समके स्वास्थ्य संस्थासे प्रदान करल सेवा सन्तोषजनक बा ।, मने स्वास्थ्य संस्थाके भवनके अभावमे कहु कहु जटिलताफे डेखल बा ।’

ओस्टेक करके गाउँपालिकामे स्वास्थ्य तथा पोषणके क्षेत्रमे कार्यक्रम संचालन करटी रहल टमान संघ संस्थासेफे अपन प्रस्तुतीकरण करल रहिट । जेम्ने याक नेपालसे स्वास्थ्य तथा पोषण कार्यक्रमके प्रस्तुतीकरण कैगिल रहे । सहास नेपालके स्थानीय प्रयासमा खाद्य तथा पोषण कार्यक्रमके प्रस्तुतीकरण कैगिल बा । सामुदायिक विकास केन्द्र, कैलारी गाउँपालिका आयूर्वेद औषधालय हसुलियालगायतके प्रस्तुतीकरण रहे ।

कार्यक्रममे सम्बोधन करटी गाउँपालिका उपाध्यक्ष भगवतीकुमारी चौधरी टमान वडामे स्वास्थ्य भवन सुरक्षित नैरहल बटैली । सुरक्षित रहलेसे सेवा प्रदान कैना मजा रहट, उहाँ कहली, ‘भवन निर्माणके लाग पालिकामे प्रर्याप्त मात्रमे बजेट नैरहल ओरसे संघीय ओ प्रदेश सरकारसे माग करले बटी । कटरा सुनुवाई हुइठ ।’
कैलारीमे फोहोर व्यवस्थापनके चुनौती रहल उहाँ बटैली ।

कार्यक्रममे वडा नम्बर ६ के वडा अध्यक्ष प्रेम बहादुर चौधरी स्वास्थ्य ओ शिक्षा क्षेत्रहे विशेष महत्व डेके काम करटी रहल बटैलै । उहाँ कहलै, ‘मानव स्वास्थ्य रहलेसे कुछफे काम करेसेक्जाइठ । मानव जीवनमे पैसासेफे स्वास्थ्य भारी बाट हो । टमान जैसिन वडामे स्वास्थ्य भवनके अभावफे, छोट ठाउँसे सेवा प्रवाह कैना अवस्था बा ।’

कार्यक्रममे एक नम्बरसे नौ वडाके वडा अध्यक्ष, स्वास्थ्य संस्थाके प्रमुख, गाउँपालिकाके प्रमुख प्रशासकीय अधिकृत खगेन्द्रराज जोशीलगायत टमान शाखाके प्रमुखहुकनके सहभागिता रहे ।