राष्ट्रिय बाल दिवसके अवसरमे वक्तृत्वकला प्रतियोगिता

पहुरा समाचारदाता
हसुलिया, ३१ भदौ । ६०औं राष्ट्रिय वाल दिवसके अवसरमे कैलारीमे सोम्मारके रोज मावि स्तरीय वक्तृत्वकला प्रतियोगिता सम्पन्न हुइल बा ।

कैलारी गाउँपालिका महिला तथा बालबालिका शाखाके आयोजना तथा टमान संघ संस्थाके सहकार्यमे दिपेन्द्र मावि हसुलियामे हुइल प्रतियोगिता हुइल हो ।

गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ बालबालिकाभिटर टमान मेरिक प्रतिभा रहल मने अवसर नैपाके बाहेर डेखाई नैसेकल बटैली । उहाँ कहली, ‘हरेक बालबालिकामे कुछ न कुछ प्रतिभा नुकल रहठ । अवसर पैलेसे ओइने अपन प्रतिभा डेखाई सेक्ठै । टबमारे पह्राईसंग सँगे अतिरिक्त क्रियाकलाप जरुरी हो ।’ बालबालिकाहुकनहे पह्रके अंगरीमे गन्ना मेरिक काम कैके डेखैना आग्रह करली । आजके विद्यार्थी कोई डाक्टर, कोई शिक्षक, कोई पाइलट, कोई इन्जिनियर, कोई नेता बन्ही मने मजा काम करके डेखाई सेक्ना मेरिक बन्ना जरुरी रहल बटैली ।

कार्यक्रममे कार्यपालिका सदस्य टीका चौधरीभुल बाल दिवसके अवसरमे आयोजित कार्यक्रमसे बालबालिका अपन क्षमता प्रदर्शन कैना अवसर पाइल बटैली । हरेक बालबालिकाके अभिभावक अपन लर्का मजा बनिट कहिके भारी लगानी लगाइल ओरसे बालबालिकाफे अभिभावकके लगानी अनुसार मजा करलेसे अभिभावक खुशी हुइना बटैली । कार्यक्रममे कार्यपालिका सदस्य लालबहादुर विक, सुन्दरी चौधरी बाल दिवसके शुभकामना डेटी आजके बालबालिका मजा करलेसे काल्हके कर्णधार रहल बटैलै ।

दिपेन्द्र माविके प्रअ विनोद भट्टराई बालबालिका अधिकार हनन हुइटी रहल बटैलै । विद्यार्थीनहे कितावी ज्ञान केल डेलेसे कुछ नैहुइना ओइनहे समय अनुसार अतिरिक्त क्रियाकलापमे सहभागिता कराई पर्ना जरुरी रहल बटैलै ।

मावि स्तरीय वक्तृत्वकला प्रतियोगिताके सहजीकरण दिपेन्द्र माविके शिक्षक नारायण ढकाल करल रहिट । प्रतियोगिताके निर्णयकमे भावना शाक्य, शौरव भण्डारी ओ भक्तराज रहल रहिट । कार्यक्रमके संचालन कैलारी गाउँपालिकाके महिला तथा बालबालिका शाखा प्रमुख बालकुमारी चौधरी करल रहिट ।

बाल दिवसके अवसरमे प्रावि स्तरीय चित्रकला प्रतियोगितामे दिपेन्द्र माविके सिरेन चौधरी पहिल, स्कूल ब्राइट स्टारके नजना चौधरी दुसरा ओ कालिका बोर्डिङ स्कूलके गोपिका चौधरी टिसरा हुइल बटी ।कलेसे सहभागी २० मध्ये १७ जनहनहे सन्तत्वना पुरस्कार वितरण कैगिल बा ।

ओस्टेक मावि स्तरीय वक्तृत्वकला प्रतियोगितामे दिपेन्द्र माविके स्वस्तिका विक पहिल, कालिका इंगलिस बोर्डिङके समिक्षा शाह दुसर ओ जनता मावि गदरियाक अन्जु चौधरी टिसरा हुइल बटै । कलेसे सहभागी २० मध्ये १७ जनहनहे सन्तत्वना पुरस्कार वितरण कैगिल बा ।