धनगढी उमपहानगरपालिकासे उदाहरणीय कार्य ः उपप्रधानमन्त्री सिंह

पहुरा समाचारदाता
धनगढी, १ कुँवार । उपप्रधानमन्त्री तथा सहरी विकासमन्त्री प्रकाशमान सिंह उदाहरणीय रहल बटैले बाटै ।

धनगढी उपमहानगरपालिकाके १० औं स्थापना दिवसहे सम्बोधन कैटी उपप्रधानमन्त्री सिंह उपमहानगरसे ढेर जनमुखी कार्य करल कहटी उदाहरणीय रहल बटाइल हुइट । ‘धनगढी उपमहानगरपालिकासे हरघरी नगर प्रहरी, शव चिस्यान सेवा, शव वाहन, वडा स्वास्थ्य क्लिनिक लगायतके जनमुखी ढेर उदाहरणीय कार्य करले बा’, उपप्रधानमन्त्री सिंह कहलै, ‘आँट कैलेसे ढेर काम करे सेकजाइठ् कना उपमहानगर उदाहरणीय बनल बा, जौन कार्यसे अन्य स्थानीय तहहे प्रेरणा मिले सेकठ् ।’

ओहे कार्यक्रममे सम्बोधन कैटी उपप्रधानमन्त्री सिंह धनगढीमे कुछ विकास नैहुइल कहिके सामाजिक सञ्जालमे लिख्ना ओ कना गलत रहल बटैले बाटै । ‘कुछ काम नैहुइल हो कहिके अपनेहुक्रे सामाजिक सञ्जालमे लिख्ठी’, उहाँ कहलै, ‘वास्तविक कुछ नैहुइल हो, अपनेहुक्रे आजकलके युवा युवती २०४२ सालमे धनगढी कैसिन रहे कहिके एकचो डाइबाबा अथवा बुडुबुडीहे पुच्छबी, अनि का कैसिन रहे कहिके वास्तविक पता पैबी ।’

उहे कार्यक्रमके बिच धनगढी उपमहानगरपालिकासे उत्कृष्ट काम करल कहटी डुई कर्मचारीहे जनही एक लाख नगदसहित पुरस्कृत करले बा । पुरस्कृत हुउइयामे डिभिजनल ईन्जिनियर दीजराज भट्ट ओ वित्त व्यवस्थापक कृष्णप्रसाद जैशी रहल बाटै । आर्थिक बर्ष २०८०÷८१ मे उत्कृष्ट काम करल कहटी उत्कृष्ट स्थानीय सेवा पुरस्कारसे उहाँहुक्रनहे सम्मान करल हो । ओस्टके, उपमहानगरमे कार्यरत अन्य कर्मचारीहे समेत नगद ओ सम्मान पत्रसहित सम्मान करल रहे ।

कार्यक्रममे शैक्षिक सत्र २०८० मे कक्षा ८, १० ओ १२ मे उत्कृष्ट अंक लनुइया संस्थागत तथा सामुदायिक विद्यालयके छात्र÷छात्रा, धनगढीस्थित छ लेन सडकमे तारजालीसहित वृक्षारोपणमे सहयोग करुइया संघसंस्था, उत्कृष्ट विद्यालय, शिक्षक, कर्मचारीलगायतहे नगद सहित सम्मान करल रहे ।

मेयर हमाल डेलै मन्त्री सिंहहे ‘स्याटेलाईट’ सिटी निर्माणसहित पाँच बुँदे ज्ञापन

धनगढी उपमहानगरपालिकाके नगर प्रमुख गोपाल हमाल उपप्रधान तथा सहरी विकास मन्त्री प्रकाशमान सिंहहे ज्ञापन पत्र बुझैले बटै । धनगढी उपमहानगरपालिकाके १० औँ स्थापना दिवसके अवसरमे मन्त्री सिंहहे नगर प्रमुख हमालसे पाँच बुँदे ज्ञापन पत्र बुझाइल रहिट ।
नगर प्रमुख हमालसे धनगढीहे ‘स्याटेलाईट’ सिटी अर्थात् बस्ती विकासके योजनाके बजेट विनियोजन, धनगढीमे नयाँ बसपार्क निर्माणके लाग बजेट, धनगढी उपमहानगरपालिकाके १ से १९ वडासमके ८५ किलोमिटर रिङरोड निर्माणके लाग बजेट, धनगढी–११ मे जग्गा विकास कार्यक्रमके लाग बजेट ओ धनगढी–८ मे निर्माण हुइल सिटी हल सञ्चालनके आवश्यक पूर्वाधार जडानके लाग बजेट विनियोजन कैना माग करले बटै ।
धनगढीमे २०७९ सालमे निर्माणके काम पूरा हुइल सिटी हलमे आवश्यक पूर्वाधारके अभावसे सञ्चालनमे आइल नैहो । नगर प्रमुख हमालसे उपकरण तथा पूर्वाधार जडान नैहुइल ओरसे सिटी हल हस्तान्तरण हुइना बाँकी रहल बटैले रहिट । उहाँ सहरी विकाससे निर्माण करल सिटी हलमे उपकरण जडान नैहुुइल ओरसे हस्तान्तरण ओ सञ्चालन करे नैसेकल बटैलै । उपप्रधान तथा सहरी विकास मन्त्री सिंहसे ११ औँ स्थापना दिवस नेपाल सरकारके लागनीमे निर्माण करल सिटी हलमे सञ्चालन करे सेक्ना बनैना प्रतिबद्धता डेले बटै । उहाँ धनगढी सिटी हलमे आवश्यक उपकरण जडान तथा पूर्वाधार निर्माणके लाग बजेट विनियोजन कैना बटैले बटै ।

धनगढी उपमहानगरपालिका–३ मे नयाँ बसपार्क निर्माणके लाग विस्तृत योजना प्रतिवेदन डिपीआर तयार हुइल बा । एक लाख जनसख््या लाभान्वित हुइना बसपार्क निर्माणके लाग संघीय सरकारसे जग्गाके भोगाधिकार डेहल नैहो । धनगढी उपमहानगरपालिकासे जग्गाके भोगाधिकार मग्टी फाइल पठैले बा ।

धनगढीमे ९५ किलोमिटर रिङरोडमे १० किलोमिटरके काम हुइल उपमहानगरपालिकासे बटैले बा । धनगढी उपमहानगरपालिकासे एक लाख ५० हजार जनसख््या लाभान्वित हुइना ८५ किलोमिटर रिङरोडके लाग बजेट विनियोजन कैना आग्रह करल हो ।