आज संविधान दिवस मनैना
मोर्चासे भर विरोधके कार्यक्रम कैके मनैना
पहुरा समाचारदाता
धनगढी, ३ कुवाँर । आज संविधान जारी हुइलक दिन नेपाल सरकारसे सार्वजनिक विदा डेटि टमान कार्यक्रमके साथ संविधान दिवस मनाइक लाग बा ।
दिवसके अवसरमे सरकारी कार्यालयमे डिया बरनालगायत अन्तरक्रिया कार्यक्रम कैके मनाजैना बा ।
ओस्टेक, थरूहट थारुवान राष्ट्रिय मोर्चा केन्द्रीय आन्दोलन परिचालन समितिसे कुवाँर ३ गतेहे करिया दिनके रुपमे मनैना कहटी विरोधके कार्यक्रम सार्वजनिक करले बा ।
मोर्चाके केन्द्र्रीय संयोजकसे श्रवण थारूसे थारु बसोबास रहल सक्कु जिल्लामे कुँवार ३ गतेसे करिया दिनके रुपमे मनैना जनैले बा ।
मोर्चासे कुवाँर ३ गते करिया दिनके रूपमे करिया पट्टी बाँधके विरोध सभा तथा कोण सभा करके थरुहट तराई भर मनैना उहाँ जनैलै ।
कुवाँर ३ गते दुपहर ठीक १२ बजे माईतीघर मण्डला काठमाण्डौमे करिया ब्यानर, प्लेकार्ड, फेटा, अपील सहित विरोध कोण सभा कैना जनागिल बा ।
कुवँर ३ गते बेरीजुन ८ बजेसे ८ः३० बजेसम (आधा घण्टा) ब्ल्याक आउट करके संविधानके विरोध जनैना ओ विरोध कार्यक्रमहे सफल, सार्थक एवं सशक्त बनैना सक्कु पहिचान पक्षधरहुकनके समन्वय तथा सहकार्य करटी अपिल कैना संयोजक थारु जनैलै ।
नेपाल सरकारसे कुवाँर ३ गतेहे संविधान दिवस एवं राष्ट्रिय दिवसके नाममे उर्दी जारी करटी मनैलेसेफे नेपालके आदिवासी भूमीपुत्र थारू, आदिवासी जनजाति, दलित, मधेसी, मुस्लिम, अल्पसंख्यक, सीमान्तकृत लगायत शोषण दमन उत्पीडनमे पारल जाति वर्ग क्षेत्र, समुदायके बहुसंख्यक जनता जारी करल संविधानके अन्तरवस्तुमे माग मुद्दा संवोधन नैहुइल कहटी फरक मत रख्टी आइल बटै । साथे संशोधनके मुद्दा उठान करटी टमान कार्यक्रमके साथ मोर्चासे सशक्त विरोध करटी आइल बा ।
थरूहट थारुवान राष्ट्रिय मोर्चा केन्द्रीय आन्दोलन परिचालन समितिके कुवाँर १ गते काठमाण्डौमे बैठल बैठकके निर्णय अनुसार कुवाँर ३ हे करिया दिनके रूपमे विरोध कार्यक्रम आयोजना करके मनैना निर्णय हुइल संयोजक जनैलै ।
विरोधके कार्यक्रममे थरूहट थारुवान राष्ट्रिय मोर्चा केन्द्रीय तथा जिल्ला संयोजन समितिसे आ–अपन पायक पर्ना ठाउँमे मनैना उहाँ जनैलै ।
