मनोसामाजिक अपांगताके सवाल बारे छलफल
पहुरा समाचारदाता
धनगढी, ३ कुँवार । सुदूरपश्चिम प्रदेशमे मनोसामाजिक अपांगताके सवालहे लेके बुधके धनगढीमे पत्रकारहुक्रन बिच छलफल हुइल बा ।
कोसिस नेपालके आयोजनामे छलफल कार्यक्रम हुइल हो । कार्यक्रममे कोशिश नेपालके कार्यक्रम संयोजक रविलोचन पौडेल मानसिक स्वास्थ्य ओ मनोसामाजिक अपांगता बारे आपन प्रस्तुतीकरण राखल रहिट । उहाँसे प्रस्तुत करगैल प्रस्तुतीकरणमे व्यक्तिके दृष्टिकोण, भौतिक अवरोध, राजनीतिक, कानुनी ओ सामाजिक कारणसे अपांगता सृजना बटाइल रहिट ।
कार्यक्रममे कोसिस नेपालके कार्यकारी निर्देशक मातृका प्रसाद देवकोटा मानसिक स्वास्थ्य तथा मनोसामाजिक अपांगताके सवालहे सम्बोधनके लाग सक्कु जाने रचनात्मक भूमिका निभाइ पर्ना औँल्याइल रहिट ।
कार्यक्रममे राष्ट्रिय अपांगता महासंघ नेपाल सुदूरपश्चिके अध्यक्ष मानबहादुर साउँद स्थानीय तथा प्रदेश सरकारमे अपांगता रहल व्यक्तिहुक्रनके अथपूर्ण सहभागिता हुइपर्ना जोड डेहल रहिट । कलेसे उहाँ प्रदेश सरकारसे बनाजैना जौन फेन ऐन कानून अपांगतामैत्री कानून बनाइ पर्ना फेन जोड डेहल रहिट ।
ओस्टके उहाँ मनोसाजिक अपांगता रहल व्यक्तिहुक्रनके न्यायमे पहुँचके अवस्था जर्जर रहल बटैटी उ सवालबारे मिडिया मार्फत उजागर करे पर्ना आग्रह करल रहिट ।
कार्यक्रममे नेपाल पत्रकार महासंघ सुुदूरपश्चिम प्रदेश अध्यक्ष योगेश रावल अपांगता रहल व्यक्तिहुक्रनके हक अधिकारबारे संवेदनशील ओ जिम्मेवार बने पर्ना बटाइल रहिट ।
कोसिस नेपालके बसन्ती शाही कार्यक्रमके उद्देश्य बारे जानकारी कराइल रही कलेसे कार्यक्रम सञ्चालन मनोविमर्श कर्ता पशुपति खाती करल रहिट ।
