मानव अधिकार सहायता कक्ष सवलीकरण विषयमे छलफल
पहुरा समाचारदाता
धनगढी, ३ कुवाँर । मानव अधिकार सहायता कक्ष सवलीकरण विषयमे बुधके रोज धनगढीमे छलफल कार्यक्रम हुइल बा ।
इन्सेक प्रदेश कार्यालय धनगढीके आयोजना तथा डिसिएके सहयोगमे गठित ‘मानव अधिकार सहायता कक्ष’ सवलीकरण विषयमे छलफल हुइल हो । समितिके संयोजक देवी खनालके अध्यक्षतामे हुइल कार्यक्रममे इन्सेक प्रदेश संयोजक खडकराज जोशी सहजीकरण करल रहिट ।
लैगिङ हिसामे परल पीडितहे आर्थिक सहयोग उपलब्ध करैना विषयबस्तुमे छलफल हुइल रहे । जेम्ने घरेलु तथा यौन हिंसामे पीडित तीन जनहनहे मानव अधिकार सहायता कक्षमार्फत आर्थिक सहयोग प्रदान कैगिल निर्णय कैगिल बा ।
मानव अधिकार सहायता कक्षहे थप प्रभावकारी बनैना सक्कु संघ संस्था आ अपन क्षेत्रसे पीडितहुकनके सूचना संकलन करके सहायतामे सिफारिस कैना निर्णय कैगिल बा ।
ओस्टेक करके जिल्ला कारागार शाखा, कैलालीमे पुर्पक्षके लाग थुनामे धारल घोडाघोडी नगरपालिका–४ जनकपुरके २२ वर्षीय दिपक विकके ०८१ भदौ ३१ गते मृत्यु हुइल घटनामे गम्भीर ध्यानकर्षण हुइल जनैले बा । संविधानके धारा १६ मे नागरिकके सम्मान पूर्वक बाँचे पैना अधिकारके सुनिश्चितत करल हुइलेसेफे राज्यसे नियन्त्रणमे लेके पुर्पक्षके लाग थुनामे राखल व्यक्तिके मृत्यु हुइना गम्भीर विषय रहल विज्ञप्तीमे कहल बा ।
कारागारमे धारल व्यक्तिके मुत्यु हुइलमे कारागार सुरक्षा मापदण्ड ओ ओकर कार्यान्वयनके अवस्थामे प्रश्न खडा हुइल बा । कारागार भिटर लागुऔषधके प्रयोग, कुटपिट तथा मृत्युके घटनासे कारागार सुरक्षा व्यवस्थापन जिम्मेवारी पूर्वक नैकरल प्रष्ट हुइठ, विज्ञप्तीमे कहल बा ।
हिरासत ओ कारागारमे धारल व्यक्तिके सुरक्षा व्यवस्थामे सम्बन्धित पक्ष गम्भीभर नइहुइना हो कलेसे भविष्यमेफे यी मेरिक दुःखद घटना हुई सेक्ना कहल बा ।
नागरिकके राज्यके निकायप्रतिके जनविश्वास समेत नइहुइना ओरसे यी मेरिक घटनाके सत्यतथ्य छानविन करके दोषीहे कानुन अनुसार कारबाही कैना ओ पीडित परिवारहे न्याय प्रदान कैना सम्बन्धीत पक्षहे अनुरोध कैगिल बा ।
