वरिष्ठ कलाकार दलबहादुर बोगटीके निधन

पहुरा समाचारदाता
धनगढी, ३ कुँवार । देउडा प्रतिष्ठानके अध्यक्ष तथा वरिष्ठ कलाकार दलबहादुर बोगटीके उपचारके क्रममे निधन हुइल बा ।

भदौ ३१ गते रात हाइस् दुर्घटनामे परके घाहिल हुइल बोगटीके शनिच्चरके रोज दिनके १ बजे धनगढीके माया मेट्रो अस्पतालमे मृत्यु हुइल जिल्ला प्रहरी कार्यालय कैलाली जनैले बा ।

धनगढी उपमहानगरपालिका वडा नम्बर ६ जालीमे ०१ ०००१ ज १५२८ नम्बरके हाइससे ठक्कर डेहेबर उहाँ घाहिल हुइल रहिट । कपारमे चोट लागके गम्भीर घाहिल बोगटी माया मेट्रो अस्पतालमे उपचाररत रहल रहिट ।

ठक्कर डेहुइया हाइसके चालक प्रहरीके नियन्त्रणमे रहल बाटै । बोगटी नेपाल प्रहरीके अवकाश प्राप्त सहायक प्रहरी निरीक्षक (सई) फेन हुइट ।