थारु गीत ‘सजन मोर’ १०० मिलियन भ्युज
पहुरा समाचारदाता
धनगढी, १५ कुवाँर । थारु गीत संगीतके क्षेत्रमे ऐतिहासिक उपलब्धी हासिल हुइल बा । टमान बाधा ओ चुनौतीके सामना करटी, दर्शकहुक्रे अत्यधिक रुचाइल थारु गीत ‘सजन मोर’ युट्युबमे १०० मिलियन भ्युज पार कर्ना पहिल थारु गीत बन्न सफल हुइल बा ।
२०७८ साल कार्तिक १८ ममे मल्टीफ्रेम स्टुडियोसे सार्वजनिक करल गीतसे थारु संगीतहे नयाँ उचाइमे पु¥याइल बा ।
सजन मोर गीतके गायनमे ए के चौधरी ओ अनु चौधरी अपन मधुर आवाज डेले बटै । गीतके शब्द ओ संगीत कुमार चौधरीसे करल हो । कलेसे एरेन्जर गणेश चौधरी करले रहिट । यी गीतमे नरेश चौधरी ओ मधु चौधरीके उत्कृष्ट अभिनय हेरे सेक्जाइठ कलेसे सम्पादनके काम सोम चौधरी करले रहिट ।
गीत २०८० सालके १० जेठमे प्राविधिक समस्याके कारण युट्युबसे हटाइल रहे । मने प्राविधिक अवरोधहे पार कैना गीतके टिमसे दिनरात मेहनत करल । लगत्ते एक महिनापाछे, गीत फेरसे युट्युबमे आइल रहे ।
सजन मोरसे १०० मिलियन भ्युज प्राप्त करलसंगे थारु गीत संगीतके इतिहासमे सर्वोउत्कृष्ट गीतके रूपमे स्थापित हुइल बा । यी सफलतासे अन्य थारु कलाकारहे थप प्रेरणा डेटी, थारु संगीतके विकासहे नयाँ दिशा डेहल बा ।
