मिडिया कप फुटसल प्रतियोगिताके उपाधी स्टेट सेभेनहे
पहुरा समाचारदाता
धनगढी, १६ कुवाँर । हिमालयन गौरीशंकर डेन्टल चौठा एनएसजेएफ मिडिया कप फुटसल प्रतियोगिताके उपाधी स्टेट सेभेन अनलाइन जिटले बा ।
नेपाल खेलकुद पत्रकार मञ्च कैलालीसे आयोजित चौठा संस्करणके हिमालयन गौरीशंकर डेन्टल एनएसजेएफ मिडिया कप फुटसल प्रतियोगिताके उपाधी स्टेट सेभेन अनलाइनसे जिटल हो । बुधके धनगढीके फल्याटल्याण्ड फुटसलमे आयोजित मिडिया कप फुटसल प्रतियोगितामे खबरकुन्ज अनलाइन उप बिजेता बनल बा ।
प्रतियोगिताके विजेता स्टेट सेभेन अनलाइनसे नगद २५ हजार तथा उपविजेता खबरकुन्ज अनलाइन नगद १५ हजार सहित ट्रफी प्राप्त करले बा । प्रतियोगिताके उत्कृष्ठ खेलाडी खबर कुन्जके प्रदिप पाठक बन्लै । उत्कृष्ठ गोलकर्ता स्टेट सेभेनके शकंर बोहरा बनेबेर स्टेट सेभेनके टकं कुँवर उत्कृष्ठ गोलकिपर बन्लै ।
प्रतियोगितामे बिश्वखोज अनलाइन, अत्तरिया पत्रकार, निर्भिक पोस्ट, इबिगुल, प्रेसपत्र, ओ खबर एण्ड लाइभ सहभागी रहिट । एक कार्यक्रमके विच हिमालयन गौरीशंकर डेन्टल क्लिनिकके सञ्चालक रतन एस.के विजेता ओ उप विजेता टिमहे पुरस्कार प्रदान करल रहिट ।
एनएसजेएफ मिडिया कप फुटसल प्रतियोगिताके सह–प्रायोजकमे निसर्ग हस्पिटल रहे । प्रतियोगिताहे नवजीवन सहकारीसे प्रवद्र्धन करल रहे । प्रतियोगिताहे मायामेट्रो अस्पताल, नोभा अस्पताल, इलाइट युथ क्लव, फल्याटल्याण्ड फुटसल लगायतसे सहयोग करल रहे ।
