जनप्रिय मनाइल सांस्कृतिक उत्सव
पहुरा समाचारदाता
मसुरिया, १६ कुवाँर । विजया दशमी, दीपावली तथा छठ पर्वके अवसर पारके गौरीगंगा नगरपालिका–८, लिक्मास्थित जनप्रिय माध्यमिक विद्यालयसे सांस्कृति उत्सव मनैले बा ।
प्रधानाध्यापक धनीदत्त भट्टके अध्यक्षतामे हुइल कार्यक्रममे विद्यालयमे अध्ययनरत विद्यार्थीहुक्रे अतिरिक्त क्रियाकलाप अन्तर्गत सांस्कृतिक उत्सव मनाइल हुइट ।
कार्यक्रममे विद्यार्थीहुक्रे पहिरनसहितके थारू नृत्य, डेउडा नृत्य तथा गीत प्रस्तुत करल रहिट । सांस्कृतिक प्रस्तुतिसंगे विद्यालयसे विद्यार्थीहुकनके अतिरिक्त क्रियाकलाप अन्तर्गत घैंटो फोड प्रतियोगिताफे करल रहे । प्रतियोगितामे विद्यार्थीओरसे कक्षा १० मे अध्ययरत विद्यार्थी प्रशान्त टमट्टा ओ शिक्षक–कर्मचारीबीचके प्रतियोगितामे विद्यालयके कर्मचारी रमा कँडेल विजय हुइल रहिट ।
ओस्टेक करके कार्यक्रममे जनप्रिय माध्यमिक विद्यालयसे सरुवा हुके गैल शिक्षक शान्ति पन्त ओ उत्तमराज पनेरुहे विदाई करल रहे । कलेसे सरुवा हुके आइल शिक्षक लक्ष्मी शर्मा जोशी, तीर्थराज जोशी, रविना चौधरी, श्यामबहादुर खत्रीहे स्वागत करल रहे । कार्यक्रममे बोल्टी प्रधानाध्यापक भट्टसे सरुवा हुके गैल शिक्षकके योगदानके कदर करटी दोसल्लासहित कदर पत्रसे सम्मानित करल रहे ।
कार्यक्रममे बोल्टी प्रधानाध्यापक भट्टसे कहलै, ‘उहाँहुक्रे विद्यालयमे पुगाइल योगदान अविष्मरणीय बा, विद्यालय परिवार उहाँहुकनहे सम्झटी रही ।’ सरुवा हुके आइल शिक्षकहे स्वागत करटी उहाँ कहलै, ‘अपनेनसंग अभिभावक तथा विद्यालय परिवारसे भारी आशा लेहल बा ।’
कार्यक्रममे सूचनाके हकके लाग राष्ट्रिय महासंघ सुदूरपश्चिम अध्यक्ष तथा नागरिक दैनिकके पत्रकार पुष्पराज जोशी, कामना टेलिभिजनके पत्रकारद्वय दिनेश खाती, दिनेश विसी ओ सुनौलो एफएमके पत्रकार विशाल साउँद तथा शिक्षक, अभिभावकके उपस्थिति रहल रहे । विद्यालके शिक्षक हिरासिंह विठाडी ओ विद्यार्थी विशाल साउँद कार्यक्रमके सञ्चालन करल रहिट ।
