जनता सामुदायिक वनके १२ औं बार्षिक साधारण सभा
पहुरा समाचारदाता
धनगढी, १७ कुवाँर । कैलालीके घोडाघोडी नगरपालिका–१२ नकफोरुवामे रहल जनता सामुदायिक वन उपभोक्ता समुहके १२औं वार्षिक साधारण सभा तथा सार्वजनिक सुनुवाई कार्यक्रम विफेक रोज निम्ज बा ।
उ सामुदायिक वनके अध्यक्ष कृष्णबहादुर चौधरीके घरगोस्यामे हुइल कार्यक्रममे घोडाघोडी नगरपालिका–१२ के वडा अध्यक्ष रामदुलारे चौधरी वरका पहुना रहल रहिट । कार्यक्रममे सम्बोधन करटी उहाँ सामुदायिक वन भिटर रहल तालतलैया विचलौलियाके कब्जामे रहल कहटी ओकर स्वामित्व सामुदायिक वन या वडा कार्यालय लेहे पर्ना उहाँ बटैलै ।
कार्यक्रमके खास पहुना सव डिभिजन वन कार्यालय पचमुडियाके रेञ्जर केशव पोखरेल सामुदायिक वन ओ सव डिभिजन वन कार्यालयके सम्बन्ध नोह ओ मास जस्टे जोरल बटैलै ।
कार्यक्रममे राष्ट्रिय माविके शिक्षक सीताराम चौधरी शुभकामना व्यक्त करल करल रहिट । मेघनम सामुदायिक वनके अध्यक्ष रामकुमार चौधरी सामुदायिक वनके साधारण सभा करेबेर छिमेकी सामुदायिक वनहे बोलैलेसे बहुट चिजमे छलफल करे सेक्ना बटैलै ।
कार्यक्रममे जनप्रिय सामुदायिक वनके अध्यक्ष सुरेश कुमार चौधरी, वाल प्रावि खोपाके शिक्षक तेजराम चौधरी, संचारकर्मी जीवन चौधरी, गाउँक भल्मन्सा हरि प्रसाद चौधरीलगायत मन्तव्य व्यक्त करल रहिट ।
कार्यक्रममे सामुदायिक वनके सचिव राजकुमारी चौधरी ३२ लाख ४८ हजार ४८१ रुप्या ७६ पैसाके आय व्यय सार्वजनिक करल रहिट । कार्यक्रममे संचालन सदस्य प्रागीलाल चौधरी करल रहिट ।
