संस्कृति संरक्षणके लाग सखिया सम्मेलन
पहुरा समाचारदाता
धनगढी, १८ कुवाँर । कैलाली जिल्लाके धनगढी उपमहानगरपालिका वडा नम्बर ६ जाली गाउँमे विफेक रोज सखिया नाँचके वडा सम्मेलन कैगिल बा ।
थारु समुदायके सखिया नाँच नच्ना परम्परा हेरैटी गैलक ओरसे बसन्ता टोल विकास संस्थाके आयोजनामे ‘हमार थारु सखिया नाँचक वडा सम्मेलन’ कैगिलक हो ।
टोल विकास संस्थाके अध्यक्ष ममिता चौधरीके अध्यक्षतामे हुइलक सखिया सम्मेलनमे प्रमुख अतिथि सुदूरपश्चिम प्रदेशसभा सदस्य रमेश धामी रहल रहिट । कार्यक्रममे सम्बोधन कैटी उहाँ थारु समुदायमे पहिले पहिले डसिया आघेसे सखिया नाँचसे गाउँघर चैनार रहल मने अब्बे सखिया नाँच कार्यक्रममे सिमित हुइल बटैलै । थारु समुदायके पहिचान कला, संस्कृति, परम्परा रहल ओरसे उहीहे नैछोरना उहाँ आग्रह करलै ।
उहाँ कहलै, संघीयतामे मुल मर्म कहल हरेक समुदायके पहिचान, कला, संस्कृतिहे समृद्ध बनैना हो । मने यिहीहे जोगेना कर्रा बा । यी कार्यक्रमसे संस्कृति संरक्षणमे टेवा पुगे सेकी ।’
कार्यक्रमके विशिष्ट पहुना वडा धनगढी उपमहानगरपालिका वडा नम्बर ६ के वडा अध्यक्ष भागीराम चौधरी, जाली सामुदायिक वनके अध्यक्ष फुलाराम चौधरी, जिल्ला समन्वय समितिके सदस्य भावना चौधरी यी कार्यक्रमहे निरन्तरता डेहे सेक्लेसे संस्कृति संरक्षण टेवा पुग्ना बटैलै । कार्यक्रममे वडा सदस्य महेन्द्र थापामगरलगायत टमान टोलके अध्यक्षहुक्रे मन्तव्य राखल रहिट ।
‘हमार थारु सखिया नाँचक वडा सम्मेलन’ मे नवदुर्गा टोल, शान्ति टोल, विजुलिया टोल, बसन्त टोल, सरस्वती तोल करके ६ टोलके सखिया नाँच डेखागैल रहे ।
कार्यक्रम संचालन अशोक चौधरी, गीता चौधरी ओ स्वागत मन्तव्य जाली सामुदायिक वन उपभोक्ता समुहके उपाध्यक्ष पार्वती चौधरी करल रहिट । कार्यक्रम संचालन करेक लाग धनगढी उपमहानगरपालिका वडा नम्बर ६ ओ जाली सामुदायिक वनसे आर्थिक सहयोग प्रदान करल रहे ।
