गैसस महासंघ कैलालीके अध्यक्षमे चेतमान साउद
पहुरा समाचारदाता
धनगढी, १९ कुवाँर । गैरसरकारी संघ महासंघ कैलालीके अध्यक्षमे चेतमान साउद निर्वाचित हुइल बटै ।
शनिच्चरके रोज धनगढीमे हुइल १७औं वार्षिक साधारणसभा तथा ११औं जिल्ला अधिवेशनसे चेतमान साउदके अध्यक्षतामे लौव कार्य समिति सर्वसहमतसे चयन कैगिल हो । महासंघके उपाध्यक्षमे विनोद कडारा, सचिवमे पवन भण्डारी, सहसचिवमे अमिर राना, कोषाध्यक्षमे विनिता खाती चयन हुइल बटी ।
ओस्टेक करके सदस्यमे नन्दराज भट्ट, लक्ष्मी विक (भुल), सीमा चौधरी, लक्ष्मीदत्त भट्ट ओ गोरख सार्की रहल बटै ।
यिहीसे आघे गैरसरकारी संघ महासंघ कैलालीके १७औं वार्षिक साधारणसभा तथा ११औं जिल्ला अधिवेशनके उदघाटनसत्र चेतमान साउदके अध्यक्षतामे हुइल रहे ।
कार्यक्रममे प्रमुख अतिथि गैरसरकारी संघ महासंघके केन्द्रीय अध्यक्ष राम प्रसाद सुवेदी रहल रहिट । उदघाटनशत्रमे सम्बोधन करटी उहाँ कैलाली जिल्ला सुदूरपश्चिम प्रदेशके केन्द्र विन्दु रहल कहटी समावेशी ओ सक्रिय व्यक्तिहुकनहे ल्यन्ना सुझाव डेहल रहिट ।
कार्यक्रमके विशिष्ट पहुना जिल्ला समन्वय समिति कैलालीके कार्यवाहक सभापति खगराज भुषाल गैरसरकारी संस्था राज्यके प्रतिस्पर्धी नैहोके सदैव सहयोगीके भूमिका निर्वाह करल बटैलै ।
दुसर विशिष्ट अतिथि सहायक प्रमुख जिल्ला अधिकारी किरण जोशी गैर सरकारी राज्यके अपरीहार्य अंगके रुपमे काम करटी रहल बटैली ।
गैरसरकारी संघ महासंघके पूर्व केन्द्रीय सचिव प्रकाश शाह गैर सरकारी संस्थाहुक्रे निष्कृय हुइटी गैल बटैलै ।
एआइएन सुदूरपश्चिम प्रदेशके प्रतिनिधि कालीदास जोशी एआइएनफे गैसस जस्ते कार्य करटी रहल ओरसे सहकार्य ओ समन्वय करके आघे बह्रना तयार रहल बटैलै ।
गैरसरकारी संघ महासंघके केन्द्रीय सदस्य सावित्रा घिमिरे अपनेहुक्रे नागरिक समाजके भूमिका निर्वाह करल बटैली । गैसस राज्यके अंगके रुपमे रहल ओ दिगा विकास लक्ष्यमे काम करटी रहल बटैली ।
कार्यक्रममे गैरसरकारी संघ महासंघके प्रदेश अध्यक्ष देवी खनाल, पूर्व जिल्ला अध्यक्ष तथा नेपाल पत्रकार महासंघके केन्द्रीय सचिव हेमकर्ण विक गैसस महासंघहे हेर्ना दृष्टिकोण फरक रहल बटैलै । कार्यक्रममे गैर सरकारी संस्था महासंघके नेपाल कैलाली जिल्लाके ११औ अधिवेशन तथा १७औं वार्षिक साधारणसभाके सांठनिक तथा प्रगति प्रतिवेदन चेतमान साउद प्रस्तुत करल रहिट । कार्यक्रममे स्वागत मन्तव्य कोषाध्यक्ष पवन भण्डारी ओ संचालन जिल्ला सचिव सरिता चौधरी करल रही ।
