नागरिक संघ संस्थाहे अभिमुखीकरण कार्यक्रम

पहुरा समाचारदाता
धनगढी, १९ कुवाँर । नागरिक संघ संस्थाहुकनके लाग शनिच्चर रोज धनगढीमे एक दिने अभिमुखीकरण कार्यक्रम कैगिल बा ।
गैर सरकारी संस्था महासंघ नेपाल सुदूरपश्चिम प्रदेश ओ एआइएनके आयोजना तथा यूरोपियन यूनियनके सहकार्यमे अभिमुखीकरण कार्यक्रम कैगिल बा ।

गैर सरकारी संस्था महासंघ नेपाल सुदूरपश्चिम प्रदेशके अध्यक्ष देवी खनालके अध्यक्षतामे हुइल कार्यक्रमके बरका पहुना महासंघके केन्द्रीय अध्यक्ष रामप्रसाद सुवेदी रहल रहिट । कार्यक्रममे सम्बोधन करटी उहाँ नागरिक संघ संस्थासे राजनितिक सहभागिताके मुद्दा उठाइल ओरसे आब नागरिकके आव आर्थिक, सामाजिक, सांस्कृतिक अधिकारके लाग आवाज उठैना जरुरी रहल बटैलै ।

कोरोना कालमे नागरिकसे सिटामोलफे नैपाइल अनुभव सुनैटी अभिनफे सुकुम्बासी, मुक्तकमैया, हलियाहुक्रे लालपुर्जासहितके न्यायिक पुनस्र्थापनाके आशयमे रहल उहाँ बटैलै । अभिनफे मनैनविच विभेद, छुवाछुट जारी रहल उहाँ बटैलै ।

राष्ट्रिय अपाङ महासंघ सुदूरपश्चिम प्रदेश अध्यक्ष मानबहादुर साउद कैलाली जिल्लामे ढेर संस्था दर्ता हुइल मने काम कैना अप्थ्यारो रहल बटैलै । संघ सस्थाके संस्था नविकरण कर्रा रहलफे उहाँ बटैलै । गैसस महासंघहे समावेशी बनैनाफे उहाँ आग्रह करलै । कार्यक्रममे नेपाल पत्रकार महासंघके केन्द्रीय सचिव हेमकर्ण विक राज्यके कामहे गैर सरकारी संस्थासे नागरिकसम सहजे पुगैना ओर विकासके काम सहयोग कैना पुलके रुपमे काम करटी रहल बटैलै ।

महासंघके प्रदेश अध्यक्ष देवी खनाल नागरिक समाज संस्थाके वर्तमान अवस्थाबारे जानकारी करैटी संघ संस्था दर्ता, नविकरण, आवद्धता सम्वन्धी समय सापेक्ष ऐन, कानून नैरहल ओ नेपाल सरकारके निकायके पत्र, परिपत्रसे नियमन करल जनैलै ।
संविधानके मौलिक अधिकारभिटर संघ संस्था खोले पैना व्यवस्था करलेसेफे तीन तहके सरकार बनलपाछे नागरिक संघ संस्थाके कार्यमुलक वातावरण खुम्चटी गैल बटैलै ।

लोक कल्याणकारी राज्यमे सरकारहे निरंकुश हुई नैडेना ओ निजी क्षेत्रहे अति मूनाफाखोरी हुई नैडेके सन्तुलन कायम कैना नागरिक समाजके भूमिका अहम रहल मने सरकारसे नागरिक संघ संस्था तथा नागरिक समाजहे सरकारसे विकास साझेदारके रुपमे पहिचान ओ व्यवहार नैकरल बटैलै ।

कार्यक्रममे संचालन गैरसरकारी संस्था महासंघ नेपाल सुदूरपश्चिम प्रदेशके सचिव लोकमान धामी करल रहिट । कार्यक्रममे महासंघके केन्द्रीय सदस्य सावित्रा घिमिरे, अजित चौधरीलगायत पहुनाके सहभागिता रहे । कार्यक्रममे गैरसरकारी संघ संस्थाके कार्यरत रहल प्रतिनिधिहुकनके सहभागिता रहे ।