दिगो विकास समाज ओ बाल कल्याण संघसे संचालित परियोजना परिचयात्मक कार्यक्रम

पहुरा समाचारदाता
हसुलिया, २४ कुवाँर । कैलालीके कैलारी गाउँपालिका वडा नम्बर ८ मे दिगो विकास समाज भजनी ओ बाल कल्याण संघ टीकापुरसे संचालित परियोजना परिचयात्मक कार्यक्रम कैगिल बा ।

कैलारी गाउँपालिकाके समन्वय तथा वल्र्ड भिजन ईन्टरनेशल नेपालके सहयोगमे दुनु संस्थासे अलग–अलग परियोजना मार्फत सञ्चालित गैल बरस कैगिलक गतिविधिके समिक्षा ओ सन २०२५ मे कैजिना गतिविधिबारे जानकारी डेहक लाग कार्यक्रमके आयोजना कैगिल हो ।

कैलारी गाउँपालिका वडा नम्बर ८ मे दिगो विकास समाज भजनीसे पोषण तथा उत्थान जिविकोपार्जन परियोजना ओ बाल कल्याण संघ टीकापुरसे बाल स्पोन्सरसीप तथा बाल संरक्षण परियोजना लागु कैगिल बा ।

दिगो विकास समाज भजनीके अध्यक्ष रामबहादुर सुनारके अध्यक्षतामे हुइल कार्यक्रममे कैलारी गाउँपालिकाके अध्यक्ष राजसमझ चौधरी प्रमुख अतिथि रहल रहिट । कार्यक्रममे सम्बोधन करटी उहाँ दुनु संस्था अन्र्तगत सञ्चालित परियोजनासे किशोर किशोरी ओ अभिभावक दनु जनहनहे फाइदा पुगल बटैलै । उहाँ कहलै, ‘बाल स्पोन्सरसिप तथा बाल संरक्षण परियोजनाके गतिविधिसे किशोर किशोरीहुकनके पह्राई संग्गे नेतृत्व विकास, व्यक्तित्व विकासंगे समाजमे रहल विकृति, विसंगति न्यूनिकरणमे टेवा पुगल बा । दुसर ओर पोषण तथा उत्थान जिविकोपार्जन परियोजनासे निम्न कृषकहुक्रे तरकारी लगायत अन्य व्यवसाय करके आर्थिक पाटो बल्गर बन्टी गैल बटै ।’
यी बरष सञ्चालन हुइना गतिविधिमे पालिकाके समन्वय निरन्तर रना उहाँ बटैलै ।

कार्यक्रममे कैलारी गाउँपालिका वडा नम्बर ८ के वडा अध्यक्ष तारामल कठरिया परियोजनासे सञ्चालित गतिविधिप्रति किशोर किशोरी ओ लाभग्राही सन्तुष्ट रहल बटैलै । उहाँ कहलै, ‘किशोर किशोरी यी परियोजनाके गतिविधिहे निरन्तरताके लाग वडा आके आग्रह करठै । किशोर किशोरीमे सकारात्मक परिवर्तनफे हुइटी गैल बा ।’
किशोर किशोरीसे परियोजनाके सिकाईहे पालिका भर लागु करलफे उहाँ बटैलै ।

कार्यक्रममे दिगो विकास समाज भजनीके कार्यक्रम संयोजक प्रभु ढकाल पोषण तथा उत्थान जिविकोपार्जन परियोजना अन्र्तगत सन गैल बरष सञ्चालन करल गतिविधि ओ सन २०२५ मे कैजिना गतिविधिबारे जानकारी डेहल रहिट । यी परियोजना अन्र्तगत वडा नम्बर ८ मे सञ्चालन कैना गतिविधिके लाग ४ लाख ४६ हजार २३६ रुप्या बजेट रहल बा ।

ओस्टेक बाल कल्याण संघ टीकापुरके कार्यक्रम अधिकृत किसन कसारा बाल स्पोन्सरसीप तथा बाल संरक्षण परियोजनाके गैल बरसके गतिविधि ओ आथिक बर्ष सन २०२५ सालके लाग तय करल कार्यक्रम तथा बजेटबारे जानकारी डेहल रहिट । यी परियोजनासे एक बरससम २७ ठो टमान मेरिक गतिविधि सञ्चालन कैना उहाँ जनैलै । वडा नम्बर ८ संचालन कैना गतिविधिके लाग ८ लाख ८० हजार ६५० रुप्या बजेट रहल उहाँ जनैलै ।

परियोजनाके परिचयात्मक कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी, अतिथिमे गाउँपालिकाके टमान शाखाके प्रमुख, दिगो विकास समाज भजनी ओ बाल कल्याण संघ टीकापुरके प्रतिनिधिहुकनके उपस्थिति रहे । कार्यक्रमके संचालन दिगो विकास समाजके सामाजिक परिचालक प्रेम चौधरी करल रहिट । कलेसे स्वागत मन्तव्य बाल कल्याण संघ टीकापुरके कोषाध्यक्ष धनराज शाही करल रहिट ।