‘किशोर किशोरीहे यौनिकता शिक्षा जरुरी’

पहुरा समाचारदाता
धनगढी, २४ कुवाँर । यार्ड नेपालके आयोजनामे वृहत यौनिकता शिक्षा सम्बन्धी सरोकारवाला निकायसंग छलफल करले बा ।
कैलालीके धनगढी उपमहानगरपालिका, गोदावरी नगरपालिका ओ कञ्चपुरके कृष्णापुर नगरपालिकामे टमान गतिविधि सञ्चालन करटी रहल ओर उ गतिविधि प्रभावकारी बनाइक लाग सरोकारवाला निकायसे छलफल कैगिल हो ।

कार्यक्रममे यार्ड नेपालके महेन्द्र शाही यौनिकता कहटीकी फरक अर्थ लगैना ओ यकर बारेमे बुझैना गाह्रो रहल ओरसे वृहत छलफल जारी रना बटैलै ।

वृहत यौनिकता शिक्षा कहलेक यौन, यौनिकता, संवेग, सम्बन्ध ओ यौन स्वास्थ्यके बारेमे जीवनभरि हुइना सिकाइ रहल बटैलै । यैसिन प्रकृतिके शिक्षासे यौन स्वास्थ्यके वारेमे जानकारी प्राप्त कैना, सीपके विकास कैना ओ सकारात्मक धारणा, विश्वास तथा मुल्य मान्यता विकास कैना सहयोग पुगैना बटैलै । यिहीसे ओइनके शारीरिक, मानसिक, सामाजिक ओ संवेगात्मक तवरसे स्वस्थ यौन जीवनयापन कैना सक्षम हुइना उहाँ बटैलै ।

कार्यक्रममे शिक्षा विकास तथा समन्वय ईकाई डोटीके उपसचिव÷ईकाई प्रमुख भीम प्रसाद पनेरु किशोर किशोरी, बालबालिकाके अवस्थाबारे प्रस्तुतीकरण करल रहिट ।

उहाँ प्रस्तुतीकरणमे वृहत यौनिकता शिक्षा काहे ?, किशोर किशोरीके जनसंख्या, किशोर किशोरीके भोजक कैलक उमेरबारे जानकारी डेहल बा ।

नेपालके ग्रामीण क्षेत्रके विद्यालयके ५० प्रतिशत ओ शहरी क्षेत्रके ३९ प्रतिशतसम किशोरी छात्राहुक्रे महिनावारीके कारणसे विद्यालयमे अनुपस्थित हुइना, नेपालमे २८ प्रतिशत सामुदायिक विद्यालयमे केल छात्राहुकनहे अलगे चर्पी, किशोरके दाँजोमे करिब २.४ वर्ष आघे किशोरीहुक्रे यौन सम्पर्क करल, किशोरी प्रजनन दर ७१ प्रति हजार रहल उहाँ जनैलै ।
हालके १९ वर्ष समके किशोरीमध्ये २५ प्रतिशतसे बच्चा पासेकल, करिब ६ प्रतिशत गर्भ खेर गैल ओ ९ प्रतिशत गर्भवती रहल, ३ प्रतिशत किशोरी यौन दुव्र्यवहार भोग्टी रहल, परिवार नियोजनाके साधनके पूरा हुई नैसेकल माग ३८.३ प्रतिशत, आधुनिक गर्भनिरोधक सेवाके प्रयोग १७.३ प्रतिशत, सुत्केरीमे मृत्यु हुइना संख्या २०–२९ वर्ष उमेरके डाईसे जन्मल बच्चासे किशोरी डाईसे जन्मल बच्चाहे ढेर बा ।

यौन तथा प्रजनन् स्वास्थ्य सम्वन्धी किशोरकिशोरीमे परटी रहल असर÷परिणामबारे जानकारी डेटी मातृ शिशु मृत्युदरमे वृद्धि, यौनजन्य संक्रमण ओ एचआईभी संक्रमण बह्रना, आङ खस्न, फिस्टुला समस्या, लागूपदार्थके प्रयोग कुलत ओ दुर्वेसन, अस्वस्थता, अशिक्षा, सामाजिक संजालके दुरुपयोग, सामाजिक लैंगिक भौगोलिक धार्मिक विभेद, बालबालिकाके कानूनी अधिकार हनन्, गरिबी ओ बेरोजगार, अन्य कानूनी समस्या हुइल उहाँ जनैलै ।

कार्यक्रम गोदावरी नगरपालिकाके नगर उपप्रमुख शारदा देवी रोकायहे प्रमुख अतिथिमे हुइल रहे । कार्यक्रममे कृष्णापुर नगरपालिका वडा नम्बर १ के वडा अध्यक्ष मोहन बस्नेत, धनगढी उपमहानगरपालिका वडा नम्बर ७ के वडा अध्यक्ष मोतीराम रानाथारु, टमान संघसंस्थाके प्रतिनिधि, धार्मिक अगुवा, किशोर किशोरी, यार्ड नेपालके कार्यक्रम अधिकृत आरती लोहार,संचारकर्मीनहे सहभागिता रहे ।